പാലക്കാട്: ഒരു വലിയ വിഭാഗം നിഷ്പക്ഷമതികളായ ജനങ്ങൾ എൽഡിഎഫിനോടും യുഡിഎഫിനോടും വിമുഖത കാണിച്ചതാണ് പോളിംഗ് ശതമാന കണക്കുകള്‍ കുറയാൻ കാരണമെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍. പ്രിയങ്കാഗാന്ധിയുടെ വരവിലൂടെ യുഡി എഫ് പ്രകടിച്ച ആത്മവിശ്വാസം അസ്ഥാനത്തായിയെന്നും അദ്ദേഹം പറഞ്ഞു.
വഖഫ് വിഷയത്തില്‍ ക്രൈസ്തവര്‍ക്കുള്ള പ്രതിഷേധവും പോളിംഗ് ശതമാനം കുറയാന്‍ കാരണമായി. തങ്ങള്‍ പാര്‍ശ്വവല്‍ക്കരിക്കപ്പെടുന്നു എന്ന ധാരണ ക്രൈസ്തവ വോട്ടര്‍മാര്‍ക്ക് ഉണ്ടായി. ന്യൂനപക്ഷ അവകാശം ഒരു വിഭാഗത്തിന്റെ മാത്രം ആയി മാറി. വലിയ തോതിലുള്ള ന്യൂനപക്ഷ ഏകീകരണത്തിന് ശ്രമിച്ചിട്ടും വയനാട്ടിലെ ഉപതെരഞ്ഞെടുപ്പിൽ അത് കണ്ടില്ല എന്നുള്ളതാണ് വസ്തുതകൾ കാണിക്കുന്നത്.
മുഖ്യമന്ത്രിക്കും പ്രതിപക്ഷ നേതാവിനും വലിയ തിരിച്ചടി കിട്ടും. യുഡിഎഫിന്റെ ജനപിന്തുണ വയനാട്ടിലടക്കം കുറഞ്ഞു. മൂന്നാം ബദലിന് ജനം ആഗ്രഹിക്കുന്നു. യുഡിഎഫ് ഈ തെരഞ്ഞെടുപ്പില്‍ അപ്രസക്തമാകും. തോല്‍ക്കുന്നതിന്റെ കാരണം കണ്ടെത്തുകയാണ് സിപിഎം. 23ന് പറയേണ്ട കാരണം ഇപ്പോള്‍ത്തന്നെ പറയേണ്ടതില്ലായിരുന്നു.സിപിഎമ്മിന് ഇപ്പോള്‍ ചിഹ്നമില്ല. തെരഞ്ഞെടുപ്പ് കഴിയുന്നതോടെ സിപിഎം കേരളത്തില്‍ ചിന്നഭിന്നമാകും.
കേരളത്തിലെ അവസാന കമ്മ്യൂണിസ്റ്റ് മുഖ്യമന്ത്രിയാണ് പിണറായി വിജയന്‍. പിണറായിയില്‍ തുടങ്ങി പിണറായിയില്‍ അവസാനിക്കുന്നതാണ് സിപിഎം. ചേലക്കരയും പാലക്കാടും ബിജെപി ജയിക്കുമെന്നും സുരേന്ദ്രന്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: