ഹൈദരാബാദ് : തെലങ്കാനയിലെ പെദ്ദപ്പള്ളി ജില്ലയിൽ ഗുഡ്‌സ് ട്രെയിൻ പാളം തെറ്റിയതിനെ തുടർന്ന് 20 പാസഞ്ചർ ട്രെയിനുകൾ റദ്ദാക്കിയതായി സൗത്ത് സെൻട്രൽ റെയിൽവേ ഉദ്യോഗസ്ഥർ അറിയിച്ചു.
ഇരുമ്പയിര് കയറ്റി വരികയായിരുന്ന ഗുഡ്‌സ് ട്രെയിനിന്റെ പതിനൊന്ന് വാഗണുകൾ ചൊവ്വാഴ്ച രാത്രി രാഘവപുരത്തിനും രാമഗുണ്ടത്തിനും ഇടയിലാണ് പാളം തെറ്റിയത്. ഗുഡ്‌സ് ട്രെയിൻ പാളം തെറ്റിയതിനെ തുടർന്ന് 20 പാസഞ്ചർ ട്രെയിനുകൾ റദ്ദാക്കിയതായും നാലെണ്ണം ഭാഗികമായി റദ്ദാക്കിയതായും 10 എണ്ണം വഴിതിരിച്ചുവിട്ടതായും എസ്‌സിആർ സോൺ അറിയിച്ചു.
കൂടാതെ രണ്ട് ട്രെയിനുകളുടെ സമയക്രമം പുനഃക്രമീകരിക്കുകയും മൂന്നെണ്ണത്തിന് നിയന്ത്രണം ഏർപ്പെടുത്തുകയും ചെയ്തു. ട്രാക്ക് പുനഃസ്ഥാപിക്കാനും ട്രെയിൻ ഗതാഗതം പുനരാരംഭിക്കാനുമുള്ള ശ്രമങ്ങൾ പുരോഗമിക്കുകയാണെന്ന് അധികൃതർ അറിയിച്ചു. സംഭവത്തിൽ റെയിൽവേ അന്വേഷണം ആരംഭിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: