കൊച്ചി: സംസ്ഥാന സ്‌കൂള്‍ അത്ലറ്റിക്സില്‍ മലപ്പുറത്തിന്റെ ചരിത്ര കിരീട നേട്ടത്തില്‍ കരുത്തായത് കടകശ്ശേരി ഐഡിയല്‍ ഇഎച്ച്എസ്എസിന്റെ കുതിപ്പ്. സ്‌കൂള്‍ ചാമ്പ്യന്മാരായ ഐഡിയലിനൊപ്പം തിരുനാവായ നാവാമുകുന്ദ സ്‌കൂളും തങ്ങളുടെ ഏറ്റവും മികച്ച പ്രകടനം നടത്തിയതോടെ പാലക്കാടിനെ പിന്നിലാക്കി കിരീടം സ്വന്തമാക്കുക എന്നത് മലപ്പുറത്തിന് ഏറെക്കുറെ അനായാസമായിരുന്നു. അത്ലറ്റിക്സിന്റെ ആദ്യ ദിനം മുതല്‍ മലപ്പുറമായിരുന്നു മുന്നില്‍. ആദ്യ ദിനത്തില്‍ മാത്രമാണ് പാലക്കാട് മലപ്പുറത്തിന് വെല്ലുവിളി ഉയര്‍ത്തിയത്. എന്നാല്‍ രണ്ടാം ദിവസം മുതല്‍ പാലക്കാട് വ്യക്തമായ ലീഡോടെ കിരീടം ലക്ഷ്യമാക്കി കുതിക്കുകയായിരുന്നു. ആദ്യ ദിനത്തിനുശേഷം ഒരിക്കല്‍ പോലും പാലക്കാടിന് മലപ്പുറത്തെ വെല്ലുവിളിക്കാനുമായില്ല.
ചരിത്ര നേട്ടത്തില്‍ ഐഡിയലിനും നാവാമുകുന്ദയ്‌ക്കും പുറമെ മറ്റ് ചില സ്‌കൂളുകളുടെ പ്രകടനം കൂടി മലപ്പുറത്തിന് സഹായകമായി. ആലത്തിയൂര്‍ കെഎച്ച്എംഎച്ച്എസ് നാല് സ്വര്‍ണവും ഒരു വെള്ളിയും നാല് വെങ്കലവും ചീക്കോട് കെകെഎംഎച്ച്എസ്എസ് രണ്ട് വീതം സ്വര്‍ണവും വെള്ളിയും പൂകൊളുത്തൂര്‍ സിഎച്ച്എംഎച്ച്എസ് രണ്ട് സ്വര്‍ണവും കാവന്നൂര്‍ സിഎച്ച്എംകെഎംഎച്ച്എസ് ഒന്ന് വീതം സ്വര്‍ണവും, വെള്ളിയും വെങ്കലവും രായിരമംഗലം എസ്എംഎംഎച്ച്എസ്എസ്, പറപ്പൂര്‍ ഐയുഎച്ച്എസ്എസ് എന്നിവരും ഓരോ സ്വര്‍ണം വീതം നേടി മലപ്പുറത്തിന്റെ കിരീടധാരത്തിന് കരുത്തേകി.
കുന്നംകുളത്ത് കഴിഞ്ഞ വര്‍ഷം നടന്ന സ്‌കൂള്‍ മീറ്റില്‍ 14-ാം സ്ഥാനത്തായിരുന്ന നാവാമുകുന്ദ സ്‌കൂള്‍ ഇത്തവണ കൊച്ചിയില്‍ നടത്തിയത് അപ്രതീക്ഷിത കുതിപ്പായിരുന്നു. അതുപോലെയായിരുന്നു മലപ്പുറത്തെ മറ്റ് സ്‌കൂളുകളും നടത്തിയ പ്രകടനം.
പ്രതികരിക്കാൻ ഇവിടെ എഴുതുക