തിരുവനന്തപുരം: വിദ്യാലയങ്ങളില് ആവശ്യമായ അടിസ്ഥാനസൗകര്യങ്ങള് ഉറപ്പാക്കുക എന്ന ലക്ഷ്യത്തോടെ പ്രമുഖ ഡിജിറ്റല് ട്രാന്സ്ഫര്മേഷന് സൊല്യൂഷന്സ് കമ്പനിയായ യുഎസ്ടി നടപ്പാക്കി വരുന്ന സിഎസ്ആര് സംരംഭമായ അഡോപ്റ്റ് എ സ്കൂള് പദ്ധതി തിരുവനന്തപുരം ഈഞ്ചക്കല് ഗവ. യുപി സ്കൂളിലും വ്യാപിപ്പിച്ചു. ഈഞ്ചക്കല് ഗവ. യുപിഎസില് പുതിയ ഐടി ലാബ് സജ്ജമാക്കിയാണ് യുഎസ്ടി അഡോപ്പ്റ്റ് എ സ്കൂള് പദ്ധതി നടപ്പാക്കിയത്.
നൂതന സാങ്കേതിക വിദ്യയില് അധിഷ്ഠിതമായ ഐടി ലാബ് സജ്ജീകരിച്ചതിനൊപ്പം ഡെസ്ക് ടോപ്പ് കമ്പ്യൂട്ടറുകള്, അവശ്യ ഫര്ണിച്ചറുകള് തുടങ്ങിയവയും കമ്പനി സ്കൂളിന് കൈമാറി. അഡോപ്റ്റ് എ സ്കൂള് പദ്ധതിയിലൂടെ ഈ വര്ഷം ഇതു വരെ 25 ലധികം സ്കൂളുകളില് ഐടി ലാബുകളും, മറ്റ് അടിസ്ഥാനസൗകര്യങ്ങളും കമ്പനി നിര്മിച്ച് നല്കി കഴിഞ്ഞു.
പുതുതായി സജ്ജീകരിച്ച ഐടി ലാബ് ഈഞ്ചക്കല് യുപിഎസിനു കൈമാറിയ ചടങ്ങില് യുഎസ്ടിയുടെ തിരുവനന്തപുരം കേന്ദ്രം മേധാവി ശില്പ മേനോന്, സിഎസ്ആര് ഫിനാന്സ് ലീഡ് വിനീത് മോഹനന്, കേരള പിആര്ആന്ഡ് മാര്ക്കറ്റിംഗ് ലീഡ് റോഷ്നി ദാസ് കെ., ക്വാളിറ്റി അഷ്വറന്സ് മേധാവി രാജേഷ് കുമാര് രാമചന്ദ്രന്, ഡെലിവറി മാനേജര് പ്രദീപ് ജോസഫ്, യുഐ ലീഡ് മനീഷ് മസൂദ് തുടങ്ങിയവര് പങ്കെടുത്തു. ഈഞ്ചക്കല് ഗവ. യുപിഎസിലെ പ്രധാന അധ്യാപകനായ അജിംഷാ എം.എ., ലാബ് ഇന് ചാര്ജ് ദിവ്യ ആര്.എസ്., മറ്റ് അധികാരികള് തുടങ്ങിയവരും പങ്കെടുത്തു.
