കൊച്ചി: ഗ്ലാമര് ഇനമായ സബ്ജൂനിയര് ആണ്കുട്ടികളുടെ 100 മീറ്ററില് അപ്രതീക്ഷിത സ്വര്ണവുമായി കാസര്കോടിന്റെ നിയാസ് അഹമ്മദ് ഓടിക്കയറിയത് ചരിത്രത്തിലേക്ക്. ഒരു പരിശീലകന്റെയും ശിക്ഷണമില്ലാതെയായിരുന്നു ഇന്നലെ മഹാരാജാസ് കോളേജിലെ സിന്തറ്റിക് ട്രാക്കില് വിസ്മയം തീര്ത്തത്. 12.40 സെക്കന്ഡിലാണ് നിയാസ് പൊന്നിലേക്ക് ഓടിക്കറിയത്. ആദ്യമായാണ് ഈ മിടുക്കന് സംസ്ഥാന മീറ്റില് പങ്കെടുക്കുന്നത്.
സിന്തറ്റിക് ട്രാക്കില് ആകെ മൂന്ന് ദിവസമാണ് നിയാസ് പരിശീലനം നടത്തിയത്. കുമ്പള ജിഎച്ച്എസ്എസ് അംഗഡിമുഗര് സ്കൂളിലെ ഒന്പതാം ക്ലാസ് വിദ്യാര്ഥിയാണ്. ദൂരക്കാഴ്ച ഇല്ലാത്തതിനാല് വളരെ പവര് കൂടിയ കണ്ണട ധരിച്ചാണ് താരം ട്രാക്കില് മിന്നുന്ന പ്രകടനം നടത്തിയത്. നല്ലൊരു ഫുട്ബോള് താരം കൂടിയാണ് നിയാസ്. കുടുംബത്തിന്റെ പ്രോത്സാഹനമാണ് താരത്തിന്റെ കരുത്ത്. കുടുംബം ഒന്നടങ്കം മത്സരം കാണാന് മഹാരാജാസ് ഗ്രൗണ്ടിലെത്തിയിരുന്നു. കാസര്കോട് കുമ്പള ബെക്കാംവളപ്പ് അബ്ദുള് ഹമീദ്-നസീമ ദമ്പതികളുടെ നാല് മക്കളില് രണ്ടാമനാണ് നിയാസ് അഹമ്മദ്.
