വധഭീഷണി ഒഴിയാതെ സൽമാൻ ഖാൻ; ഇത്തവണ ഒരു പാട്ടിന്റെ പേരിൽ

നടൻ സൽമാൻ ഖാന് ലൊറൻസ് ബിഷ്ണോയ് സംഘത്തിൽ നിന്നും വീണ്ടും വധ ഭീഷണി. വ്യാഴാഴ്ച രാത്രിയാണ് മുബൈ ട്രാഫിക് കൺട്രോൾ റൂമിലേക്ക് സന്ദേശം എത്തിയത്. സംഭവത്തിൽ അജ്ഞാതനായ ഒരാൾക്കെതിരെ പോലീസ് കേസെടുത്തു.

ഒരു ഗാനത്തിന്റെ പേരിലാണ് പുതിയ ഭീഷണി. സൽമാൻ ഖാനെയും ലൊറൻസ് ബിഷ്ണോയിയേയും ബന്ധിപ്പിക്കുന്ന ഒരു ഗാനത്തെ പരാമർശിച്ചായിരുന്നു ഭീഷണി. ഗാനരചയിതാവിന് ഇനി പാട്ടെഴുതാൻ കഴിയില്ലെന്നാണ് ഭീഷണി. സൽമാൻ ഖാന് ധൈര്യമുണ്ടെങ്കിൽ അയാളെ രക്ഷിക്കാം എന്നാണ് വെല്ലുവിളി സന്ദേശത്തിൽ പറയുന്നത്.

കഴിഞ്ഞ കുറച്ച് മാസങ്ങളായി ബിഷ്‌ണോയ് സംഘത്തിൽ നിന്ന് സൽമാൻ ഖാൻ നിരന്തരം ഭീഷണി നേരിടുന്നു . 1998ൽ സൽമാൻ ഖാൻ രണ്ട് കൃഷ്ണമൃഗങ്ങളെ വേട്ടയാടി കൊന്നതാണ് സംഘർഷത്തിന്റെ കേന്ദ്രം. ഇന്ത്യയിലെ മത വിഭാഗങ്ങളിലൊന്നായ ബിഷ്ണോയികൾ ദൈവതുല്യമായി കണക്കാക്കുന്ന മൃഗമാണ് കൃഷ്ണമൃഗം. തങ്ങളുടെ ഗുരുവായ ജംബാജിയുടെ പുനർജ്ജന്മമായാണ് ഇവർ കൃഷ്ണമൃഗത്തെ കണക്കാക്കുന്നത്. കൃഷ്ണമൃഗങ്ങളുടെ സംരക്ഷണത്തിനായി ഏതറ്റം വരെ പോകാനും ഒരു മടിയുമില്ല.