തിരുവനന്തപുരം: പിഎസ്സി അംഗങ്ങളുടെ ശമ്പളം വര്‍ദ്ധിപ്പിക്കാനുള്ള ശുപാര്‍ശ മന്ത്രിസഭ തള്ളി. സംസ്ഥാനത്തെ സാമ്പത്തിക പ്രതിസന്ധി കണക്കിലെടുത്താണ് ശുപാര്‍ശ തള്ളിയത്.
ആനുകൂല്യങ്ങള്‍ ഉള്‍പ്പെടെ ചെയര്മാന് ശമ്പളം 3.81 ലക്ഷം രൂപയും അംഗങ്ങളുടേത് 3.73 ലക്ഷവുമായി വര്‍ദ്ധിപ്പിക്കാനാണ് ശുപാര്‍ശ ഉണ്ടായിരുന്നത്. നിലവില്‍ ചെയര്മാന് 2,24,100 രൂപയും അംഗങ്ങള്‍ക്ക് 2,19,090 രൂപയുമാണ് ശമ്പളം.
ജുഡീഷ്യല്‍ ഓഫീസര്‍മാരുടെ ശമ്പള സ്‌കെയിലാണ് പിഎസ്സി അംഗങ്ങള്‍ക്കും.ജുഡീഷ്യല്‍ ഓഫീസര്‍മാരുടെ ശമ്പളം വര്‍ദ്ധിപ്പിച്ചെന്ന് കാട്ടിയായിരുന്നു പിഎസ്സി ചെയര്മാന് ശമ്പള വര്‍ധനവ് ആവശ്യപ്പെട്ടത്.
2016 ജനുവരി മുതല്‍ മുന്‍കാല പ്രാബല്യം വേണമെന്നായിരുന്നു ആവശ്യം. ശമ്പളം വര്‍ധിപ്പിക്കുന്നതിനെ മന്ത്രിസഭാ യോഗത്തില്‍ കെ.രാജന്‍, പി.പ്രസാദ്, പി.രാജീവ്, മുഹമ്മദ് റിയാസ് എന്നിവര്‍ സാമ്പത്തിക ബാധ്യത ചൂണ്ടിക്കാട്ടി എതിര്‍ത്തു.
ഇതോടെ മുഖ്യമന്ത്രി കാബിനറ്റ് ശുപാര്‍ശ പിന്‍വലിച്ചു. ശമ്പള വര്‍ദ്ധന നടപ്പിലാക്കിയാല്‍ കുടിശിക നല്‍കാന്‍ തന്നെ 35 കോടി രൂപ കണ്ടെത്തണമെന്നും മന്ത്രിമാര്‍ പറഞ്ഞു. ചെയര്മാന് ഉള്‍പ്പെടെ 21 അംഗങ്ങളാണ് സംസ്ഥാനത്ത് പിഎസ്‌സിയിലുള്ളത്.
രാജ്യത്തെ ഏറ്റവും കൂടുതല്‍ അംഗങ്ങളുള്ള പിഎസ്സി കേരളത്തിലേതാണ്. വലിയ സംസ്ഥാനങ്ങളില്‍ പോലും ഇവിടെ ഉളളത്രയും അംഗങ്ങള്‍ ഇല്ല.
പ്രതികരിക്കാൻ ഇവിടെ എഴുതുക: