പാലക്കാട് : ജില്ലയില്‍ വമ്പന്‍ കായിക പദ്ധതിയുമായി കേരള ക്രിക്കറ്റ് അസോസിയേഷന്‍. മലബാര്‍ ദേവസ്വത്തിന്റെ പാലക്കാട് ശ്രീ ചാത്തന്‍കുളങ്ങര ദേവി ക്ഷേത്രം ട്രസ്റ്റ്റ്റിന്റെ 21 ഏക്കര്‍ സ്ഥലത്താണ് സ്‌പോര്‍ട്‌സ് ഹബ് സ്‌റ്റേഡിയം നിര്‍മ്മിക്കുന്നത്. പാട്ട കരാറിന്റെ അടിസ്ഥാനത്തില്‍ കേരള ക്രിക്കറ്റ് അസോസിയേഷന്‍ 33 വര്‍ഷത്തേക്കാണ് ഭൂമി ഏറ്റെടുക്കുക.
രണ്ടു ക്രിക്കറ്റ് മൈതാനങ്ങള്‍, ഫഌ് ലൈറ്റ് , ക്ലബ് ഹൗസ് , നീന്തല്‍ കുളം,ബാസ്‌കറ്റ് ബോള്‍, ഫുട്‌ബോള്‍ മൈതാനങ്ങള്‍, മറ്റ് കായിക ഇനങ്ങള്‍ക്കുള്ള സൗകര്യങ്ങള്‍ എന്നിവ സ്‌പോര്‍ട്‌സ് ഹബ് സ്‌റ്റേഡിയത്തില്‍ ഉണ്ടാകും.30 കോടി രൂപ ചെലവ് പ്രതീക്ഷിക്കുന്നതാണ് പദ്ധതി.
പദ്ധതിയിലൂടെ ക്ഷേത്രത്തിന് വര്‍ഷം 21,35000 രൂപ ലഭിക്കും. കൂടാതെ 10 ലക്ഷം രൂപ നിക്ഷേപമായും കേരള ക്രിക്കറ്റ് അസോസിയേഷന്‍ നല്‍കും. പദ്ധതിയില്‍ പ്രദേശികവാസികള്‍ക്ക് ജോലിക്ക് മുന്‍ഗണന നല്‍കാനും വ്യവസ്ഥ ഉണ്ട്.
ക്ഷേത്രത്തിന്റെയും ക്രിക്കറ്റ് അസോസിയേഷന്റെയും പേരിലായിരിക്കും സ്‌പോര്‍ട്‌സ് ഹബ് നിര്‍മ്മാണം. ഡിസംബറില്‍ കരാര്‍ ഒപ്പുവയ്‌ക്കും. 2025 ജനുവരിയില്‍ നിര്‍മ്മാണം ആരംഭിക്കും. ആദ്യഘട്ട നിര്‍മ്മാണം 2026 ല്‍ പൂര്‍ത്തിയാക്കാനാണ് നിശ്ചയിച്ചിട്ടുളളത്. രണ്ടാം ഘട്ടം 2027 ഏപ്രില്‍ മാസത്തോടെ പൂര്‍ത്തീകരിക്കും.
നടപടിക്രമങ്ങള്‍ 2018ല്‍ തുടങ്ങിയെങ്കിലും കോവിഡ് മൂലം വൈകി. മദ്രാസ് ഹിന്ദു റിലീജിയസ് ആന്‍ഡ് ചാരിറ്റബിള്‍ എന്‍ഡോവ്‌മെന്റ് ആക്ട് 1951 പ്രകാരം തുടങ്ങിയ നടപടികള്‍ മലബാര്‍ ദേവസ്വവും അമ്പലം ട്രസ്റ്റും സെപതംബറില്‍ തന്നെ പൂര്‍ത്തിയാക്കി.
സ്‌പോര്‍ട്‌സ് ഹബ് പൂര്‍ത്തിയാകുന്നതോടുകൂടി എല്ലാ കായിക ഇനങ്ങളും ഒരു കുടക്കിഴില്‍ വരുന്നത് ജില്ലയിലെ കായിക മേഖലക്ക് വന്‍ കുതിപ്പ് ഉണ്ടാക്കുമെന്നാണ് പ്രതീക്ഷ.
പ്രതികരിക്കാൻ ഇവിടെ എഴുതുക