കൊച്ചി: വ്യാജ മൊബൈല്‍ ആപ്ലിക്കേഷന്‍ വഴി ലക്ഷങ്ങള്‍ തട്ടിയ കൊല്ലം സ്വദേശിനി കൊച്ചി സൈബര്‍ പോലീസ് പിടിയില്‍. പള്ളിത്തോട് ഡോണ്‍ബോസ്‌കോ നഗര്‍ സ്വദേശിനി
ജെന്‍സിമോളാ (24) ണ് അറസ്റ്റിലായത്.
എഎസ്ഒ എന്ന ഓണ്‍ലൈന്‍ ബിസിനസ് ആപ്ലിക്കേഷനിലൂടെ അധിക വരുമാനമുണ്ടാക്കാമെന്ന് വിശ്വസിപ്പിച്ചാണ് 1500 ഓളം പേരില്‍ നിന്നായി ലക്ഷങ്ങള്‍ തട്ടിയത്. തട്ടിപ്പിന് ശേഷം വിദേശത്തേക്ക് രക്ഷപ്പെടാന്‍ ശ്രമിക്കുമ്പോഴാണ് ജെന്‍സി പിടിയിലായത്.
20,000 രൂപ ആപ്ലിക്കേഷന്‍ വഴി നിക്ഷേപിച്ചാല്‍ ദിവസം തോറും ലാഭം ലഭിക്കും എന്നായിരുന്നു ഇവര്‍ നിക്ഷേപകരെ വിശ്വസിപ്പിച്ചിരുന്നത്. വാഗ്ദാനത്തില്‍ വിശ്വസിച്ച് സാധാരണക്കാരായ നിരവധി ആളുകള്‍ തങ്ങളുടെ സമ്പാദ്യം പ്രതിയുടെ അക്കൗണ്ടിലേക്കും പ്രതി നല്‍കിയ മറ്റ് പല അക്കൗണ്ടിലേക്കും നിക്ഷേപിച്ചു. നിക്ഷേപിച്ച തുകയും അതിന്റെ ലാഭവും ആപ്ലിക്കേഷനില്‍ കാണിച്ചിരുന്നതിനാല്‍ പലരും ഈ തട്ടിപ്പിലേക്ക് വീഴുകയായിരുന്നു.
ആദ്യം പണം നിക്ഷേപിച്ച ആളുകള്‍ക്ക് നിക്ഷപിച്ച തുകയും വന്‍ ലാഭവും തിരികെ കിട്ടി. ഇങ്ങനെ കിട്ടിയവര്‍ പറഞ്ഞറിഞ്ഞും പലരും ഈ തട്ടിപ്പിലേക്ക് ചെന്നു വീണു. പലര്‍ക്കും നിക്ഷേപിച്ച തുകയും ലാഭവും ആപ്ലിക്കേഷനില്‍ കാണിച്ചിരുന്നു. എന്നാല്‍ പിന്‍വലിക്കാന്‍ സാധിക്കാതെ വന്നപ്പോഴാണ് തട്ടിപ്പാണെന്ന് ഇവര്‍ തിരിച്ചറിഞ്ഞത്.
തട്ടിപ്പ് തിരിച്ചറിഞ്ഞ് ഫോര്‍ട്ടുകൊച്ചി സ്വദേശിയും 52 പേരും ചേര്‍ന്ന് പരാതി തയ്യാറാക്കി കൊച്ചി സിറ്റി പോലീസ് കമ്മീഷണര്‍ക്ക് നല്‍കി. കമ്മിഷണറുടെ നിര്‍ദ്ദേശപ്രകാരം കൊച്ചി സൈബര്‍ പോലീസ് സ്റ്റേഷനിന്‍ കേസ് രജിസ്റ്റര്‍ ചെയ്തു. തുടര്‍ന്ന് ജെന്‍സി പിടിയിലാവുകയായിരുന്നു. മറ്റ് പ്രതികള്‍ക്കായുള്ള അന്വേഷണം ഊര്‍ജിതമാക്കിയതായി പൊലീസ് അറിയിച്ചു.
എംഎല്‍എം പോലുള്ള മള്‍ട്ടി ലെവല്‍ മാര്‍ക്കറ്റിംഗ് രീതിയിലാണ് പ്രതികള്‍ ആളുകളെ ചേര്‍ത്തിരുന്നത്. മൊബൈല്‍ ആപ്ലിക്കേഷന്‍, വ്യാജ ക്രിപ്‌റ്റോ കറന്‍സി, ഡിജിറ്റല്‍ അറസ്റ്റ് പോലെ പലതരത്തിലുള്ള തട്ടിപ്പുകള്‍ തുടരുകയാണെന്നും ഇത്തരം തട്ടിപ്പുകളില്‍ വീഴരുതെന്നും കൊച്ചി സിറ്റി പോലീസ് മുന്നറിയിപ്പ് നല്‍കി.
പ്രതികരിക്കാൻ ഇവിടെ എഴുതുക: