കോട്ടയം: ടയര്‍ കമ്പനികള്‍ ആഭ്യന്തര വിപണിയില്‍ സജീവമായി ഇടപെടണമെന്നും തുടര്‍ച്ചയായ റബര്‍ സംഭരണം ഉറപ്പാക്കണമെന്നും റബര്‍ ബോര്‍ഡ് എക്‌സി. ഡയറക്ടര്‍ എം. വസന്തഗേശന്‍ ആവശ്യപ്പെട്ടു.
ടയര്‍ കമ്പനികളുടെ പ്രതിനിധികള്‍ ഉള്‍പ്പെടെ പ്രധാനപ്പെട്ട റബര്‍ ഉപഭോക്താക്കളുമായി നടത്തിയ യോഗത്തിലാണ് അദ്ദേഹം ഈ നിര്‍ദേശം മുന്നോട്ടുവെച്ചത്. മാസങ്ങളായി റബറിന്റെ വില അതിവേഗം കുറയുന്ന സാഹചര്യത്തിലാണ് ഇത്തരത്തിലുള്ള നടപടി ആവശ്യമായിരിക്കുന്നത്.
കഴിഞ്ഞവര്‍ഷം വന്‍തോതിലുള്ള ഇറക്കുമതി മൂലം റബര്‍ വില കുറയാന്‍ ഇടയായി. ആ സമയത്ത് കര്‍ഷകര്‍ ടാപ്പിങ്ങില്‍ നിന്ന് വിട്ടുനില്‍ക്കുകയും റബര്‍ പാല്‍ ഷീറ്റാക്കുന്നതിന് പകരം പാല്‍ ആയിത്തന്നെ വിപണം നടത്തുകയും ചെയ്തു. ഈ വര്‍ഷവും വിലയിടിവ് തുടര്‍ന്നാല്‍ കഴിഞ്ഞവര്‍ഷത്തെ സാഹചര്യം ഉണ്ടാകാന്‍ സാധ്യതയുണ്ടെന്ന് എക്‌സിക്യൂട്ടീവ് ഡയറക്ടര്‍ ഉത്പന്ന നിര്‍മാതാക്കളെ ഓര്‍മിപ്പിച്ചു.
വന്‍തോതിലുള്ള റബര്‍ ഇറക്കുമതിക്ക് മുതിരാതെ ആഭ്യന്തരവിപണിയില്‍ നിന്ന് പരമാവധി റബര്‍ സംഭരിക്കണമെന്ന് അദ്ദേഹം നിര്‍ദേശിച്ചു. റബര്‍ പോലെയുള്ള ഒരു ദീര്‍ഘകാലവിളയില്‍ പെട്ടെന്നുണ്ടാകുന്ന വിലയിടിവും അനിശ്ചിതത്വവും തുടരുന്നത് നല്ലതല്ലെന്നും അത്തരത്തിലുള്ള സാഹചര്യം തരണം ചെയ്യാന്‍ ഉത്പന്ന നിര്‍മാതാക്കളുടെ കൈത്താങ്ങ് ആവശ്യമാണെന്നും അദ്ദേഹം പറഞ്ഞു.
കോമ്പൗണ്ടഡ് റബറിന്റെ വന്‍തോതിലുള്ള ഇറക്കുമതി ആശങ്കയുണ്ടാക്കുന്നതാണ്. അതിനാല്‍ വിപണിയിലെ ചലനങ്ങള്‍ റബര്‍ബോര്‍ഡ് സസൂക്ഷ്മം നിരീക്ഷിക്കുകയും ആഭ്യന്തര റബര്‍ വിപണി സുസ്ഥിരമാകാന്‍ ഉപകരിക്കുന്ന നയപരമായ തീരുമാനങ്ങള്‍ എടുക്കുന്നതിന് സഹായിക്കുന്ന റിപ്പോര്‍ട്ടുകള്‍ കേന്ദ്രസര്‍ക്കാരിലേക്ക് നല്‍കുകയും ചെയ്യുമെന്ന് എക്‌സി. ഡയറക്ടര്‍ പറഞ്ഞു.
പ്രതികരിക്കാൻ ഇവിടെ എഴുതുക: