സാന്‍സിറോ: എസി മിലാനെ സ്വന്തം തട്ടകത്തില്‍ തോല്‍പ്പിച്ച് ഇറ്റാലിയന്‍ സീരി എയില്‍ നാപ്പോളിയുടെ കുതിപ്പ്. ഇന്നലെ നടന്ന പോരാട്ടത്തില്‍ എതിരില്ലാത്ത രണ്ട് ഗോളുകള്‍ക്കാണ് മിലാനെ കീഴടക്കിയത്.
പത്ത് കളികള്‍ പൂര്‍ത്തിയാക്കിയ നാപ്പോളി എട്ട് വിജയങ്ങളില്‍ നിന്ന് 25 പോയിന്റ് നേടി സീരി എയില്‍ മുന്നില്‍ തുടരുകയാണ്. തൊട്ടുതാഴെയുള്ള ഇന്റര്‍മിലാനെക്കാള്‍ ഏഴ് പോയിന്റിന് മുന്നിലാണ് നാപ്പോളി. വിഖ്യാത പരിശീലകന്‍ ആന്റോണിയോ കോന്റെയ്‌ക്ക് കീഴില്‍ ഈ സീസണിലിറങ്ങിയ ടീം ആദ്യ ലീഗ് മത്സരത്തില്‍ മാത്രമാണ് പരാജയപ്പെട്ടത്. പിന്നീട് നടന്ന ഒമ്പത് കളികളിലും ടീം തോല്‍വി അറിഞ്ഞിട്ടില്ല.
എസി മിലാനെതിരെ ബെല്‍ജിയം സ്‌ട്രൈക്കര്‍ റൊമേലു ലുക്കാക്കുവിന്റെ തകര്‍പ്പന്‍ ഗോളോടെ തുടക്കത്തില്‍ തന്നെ നാപ്പോളി മിലാന് മേല്‍ ആധിപത്യം പുലര്‍ത്തി.
കളിയുടെ അഞ്ചാം മിനിറ്റിലായിരുന്നു ഈ ഗോള്‍. ആദ്യ പകുതി പിരിയും മുമ്പേ ടീം രണ്ടാം ഗോളും നേടി. ഖ്വിച്ച ക്വാരാറ്റ്‌സ്ഖീലിയ ആണ് ഗോള്‍ സ്‌കോറര്‍. കഴിഞ്ഞ സീസണില്‍ നാപ്പോളി നിരാശപ്പെടുത്തുന്ന പ്രകടനത്തോടെയാണ് ലീഗ് അവസാനിപ്പിച്ചത്.
പ്രതികരിക്കാൻ ഇവിടെ എഴുതുക: