ചെന്നൈ: നടൻ വിജയ്യുടെ രാഷ്‌ട്രീയപ്പാർട്ടിയായ തമിഴക വെട്രി കഴകത്തിന്റെ ആദ്യ സംസ്ഥാന സമ്മേളനത്തിൽപങ്കെടുക്കാൻ എത്തിച്ചേർന്നത് ലക്ഷങ്ങൾ. അഞ്ചുലക്ഷം പേരെയായിരുന്നു പാർട്ടി പ്രതീക്ഷിച്ചത്. അരലക്ഷം പേർക്കുള്ള കസേരകളാണ് ഒരുക്കിയത്. കുറഞ്ഞത് മൂന്നുലക്ഷത്തിലേറെപ്പേർ സമ്മേളനത്തിന് എത്തിയിട്ടുണ്ടെന്നാണ് റിപ്പോർട്ടുകൾ.
കനത്ത ചൂടും പ്രതികൂലകാലാവസ്ഥയും സമ്മേളനത്തിന് എത്തിയവർക്ക് വെല്ലുവിളിയായി. കത്തുന്ന സൂര്യനിൽനിന്നുള്ള രക്ഷയ്‌ക്കായി സമ്മേളനത്തിനെത്തിയവർ തലയിൽ കസേരയെടുത്തുവെച്ചാണ് നിന്നത്. നിർജലീകരണത്തെത്തടുർന്ന് 90-ഓളം പേർ കുഴഞ്ഞുവീണതായി പ്രാദേശിക മാധ്യമങ്ങൾ റിപ്പോർട്ടുചെയ്തു.
സമ്മേളന സ്ഥലത്തേക്ക് കൂടുതൽ മെഡിക്കൽ സംഘത്തെ നിയോഗിച്ചിട്ടുണ്ട്. കനത്ത ചൂടിനെത്തുടർന്ന് നിർജലീകരണമടക്കം ആരോഗ്യപ്രശ്നങ്ങളുണ്ടായവർക്ക് മെഡിക്കൽ സംഘം പ്രാഥമിക ശുശ്രൂഷ നൽകി.
വാഹനങ്ങളുടെ നീണ്ടനിരമൂലം ഗതാഗതസ്തംഭനവുമുണ്ടായി. കിലോമീറ്ററുകൾ ദൂരത്തിലാണ് വാഹനങ്ങൾ കുടുങ്ങിക്കിടന്നത്. 6,000 പോലീസുദ്യോഗസ്ഥരെയാണ് സുരക്ഷാചുമതലയ്‌ക്കായി ഒരുക്കിയത്. വടക്കൻ മേഖലാ ഐ.ജി. അശ്ര ഗാർഗിന്റെ നേതൃത്വത്തിലാണ് സുരക്ഷാ ക്രമീകരണം. 350 മൊബൈൽ ശൗചാലയങ്ങളും ക്രമീകരിച്ചിരുന്നു. 86 ഏക്കറിലെ സമ്മേളന നഗരിക്ക് സമീപം, 270 ഏക്കറിലാണ് വാഹനപാർക്കിങ്ങിന് സൗകര്യമൊരുക്കിയത്
സമ്മേളനത്തിൽ പങ്കെടുക്കാൻ പോയ സംഘത്തിൽപ്പെട്ട മൂന്നുപേർ രണ്ടുവ്യത്യസ്ത അപകടങ്ങളിലായി മരിച്ചതായും റിപ്പോർട്ടുണ്ട്
പ്രതികരിക്കാൻ ഇവിടെ എഴുതുക: