മുംബൈ: 26/11 മുംബൈ ഭീകരാക്രമണത്തിന് സമാനമായ ആക്രമണം വീണ്ടും ഉണ്ടായാല്‍ ശക്തമായ തിരിച്ചടിയുണ്ടാകുമെന്ന് കേന്ദ്രവിദേശകാര്യ മന്ത്രി ഡോ.എസ്. ജയശങ്കര്‍. മുംബൈയിലുണ്ടായത് ആവര്‍ത്തിക്കാന്‍ പാടില്ല. മുംബൈ ഭീകരാക്രമണത്തില്‍ ഭാരതത്തിന്റെ ഭാഗത്ത് നിന്ന് യാതൊരു പ്രതികരണവും ഉണ്ടായില്ല. എന്നാല്‍ ഇന്നത്തെ ഭാരതത്തില്‍ അങ്ങനെ ആയിരിക്കില്ലെന്നും കൃത്യമായ തിരിച്ചടിയുണ്ടാകുമെന്നും അദ്ദേഹം മുംബൈയില്‍ മാധ്യമപ്രവര്‍ത്തകരോട് പറഞ്ഞു.
ഭീകരതയ്‌ക്കെതിരെയുള്ള പോരാട്ടത്തില്‍ മുംബൈ രാജ്യത്തിനും ലോകത്തിനും മാതൃകയാണെന്നും ജയശങ്കര്‍ പറഞ്ഞു. ഐക്യരാഷ്‌ട്രസഭ രക്ഷാസമിതിയില്‍ ഭാരതം അംഗമായിരുന്നപ്പോള്‍ ഭീകര വിരുദ്ധ സമിതിയുടെ അധ്യക്ഷ സ്ഥാനം ഭാരതത്തിനായിരുന്നു. ഭീകരാക്രമണം നടന്ന അതേ ഹോട്ടലില്‍ ആയിരുന്നു ഭീകരവിരുദ്ധ സമിതിയുടെ യോഗം നടന്നത്. ഭാരതം ഭീകരതയ്‌ക്കെതിരെ കടുത്ത നിലപാട് സ്വീകരിക്കുന്ന രാഷ്‌ട്രമാണ്. ആരെങ്കിലും നമുക്കെതിരെ പ്രവര്‍ത്തിച്ചാല്‍ തിരിച്ചടിയുണ്ടാകുമെന്ന ശക്തമായ സന്ദേശം തന്നെയാണ് നാം നല്‍കുന്നത്. പകല്‍ ഭീകരതയ്‌ക്കെതിരെ സംസാരിക്കുകയും രാത്രിയില്‍ ഭീകരതയെ പ്രോത്സാഹിപ്പിക്കുകയും ചെയ്യുന്നതും തങ്ങള്‍ മാത്രം ശരിയാണെന്ന് നടിക്കുന്നതും അംഗീകരിക്കാനാകില്ല. ഇതാണ് തിരുത്തേണ്ടത്. പ്രതികരിക്കേണ്ട സമയത്ത് ഉചിതമായി പ്രതികരിക്കുമെന്നും അദ്ദേഹം പറഞ്ഞു.
അതിര്‍ത്തിയില്‍ നിന്ന് സൈനിക പിന്മാറ്റം തുടങ്ങുന്നതിന് മുമ്പ് തന്നെ ലഡാക്കിലെ യഥാര്‍ത്ഥ നിയന്ത്രണ രേഖയില്‍ 2020 ഏപ്രിലിന് മുമ്പുണ്ടായിരുന്ന സ്ഥിതി പുനഃസ്ഥാപിക്കും. ദെംചോക്കിലും ദെസ്പാങിലും 2020 ഒക്ടോബര്‍ 31ലെ സ്ഥിതിയിലേക്ക് കാര്യങ്ങള്‍ എത്തിക്കാനാണ് ശ്രമിക്കുന്നത്. ഇതിന് കുറച്ച് സമയം വേണ്ടി വരുമെന്നും അദ്ദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: