ഇടുക്കി: മുള്ളരിങ്ങാടും പരിസരങ്ങളിലും തോട് കര കവിഞ്ഞ് ഒഴുകിയതിനെ തുടര്‍ന്ന് സ്‌കൂട്ടര്‍ യാത്രികന്‍ ഒഴുക്കില്‍പ്പെട്ടു. ഇന്നലെ വൈകിട്ടുണ്ടായ ശക്തമായ മഴയെ തുടര്‍ന്നാണ് തോട് കര കവിഞ്ഞ് ഒഴുകിയത്. ജമീല്‍ വെട്ടിക്കല്‍ എന്നയാളാണ് മഴവെള്ളപ്പാച്ചിലില്‍ അകപ്പെട്ടത്. ഒഴുക്കില്‍പ്പെട്ട ജമീല്‍ അതിസാഹസികമായാണ് വെള്ളത്തില്‍ നിന്ന് രക്ഷപ്പെട്ടത്. അമയല്‍ തൊട്ടി ഭാഗത്ത് ഇന്നലെ വൈകിട്ടോടെയാണ് സംഭവം.
കട്ടക്കളത്തില്‍ ജോലി കഴിഞ്ഞ് സ്‌കൂട്ടറില്‍ വീട്ടിലേക്ക് മടങ്ങുകയായിരുന്നു ജമീല്‍. തോട് കരകവിഞ്ഞ് റോഡില്‍ നിറഞ്ഞ് ഒഴുകിയ വെള്ളത്തില്‍ ജമീല്‍ ഓടിച്ചിരുന്ന സ്‌കൂട്ടര്‍ ഒഴുകി പോകുകയായിരുന്നു. ജമീലും ഒഴുക്കില്‍പ്പെട്ടെങ്കിലും നാട്ടുകാര്‍ ഓടിയത്തി രക്ഷപെടുത്തി. ഒഴുകിപ്പോയ സ്‌കൂട്ടര്‍ കണ്ടെത്താനായില്ല. ഇന്ന് ജില്ലയിലാകെ അതിശക്തമായ മഴയാണ് പെയ്തത്. പകല്‍ സമയത്തും മഴ ഉണ്ടായിരുന്നെങ്കിലും വൈകിട്ടോടെ ശക്തി പ്രാപിക്കുകയായിരുന്നു.
പ്രതികരിക്കാൻ ഇവിടെ എഴുതുക: