തിരുവനന്തപുരം:ഓണ്ലൈനിലൂടെ ഓഹരി ഇടപാട് നടത്താമെന്നും വന് തുക ലാഭം കൊയ്യാമെന്നും വിശ്വസിപ്പിച്ച് വനിതാ ഡോക്ടറുടെ 87 ലക്ഷം രൂപ തട്ടി.കഴിഞ്ഞ ഒരു മാസം കൊണ്ടാണ് തുക തട്ടിയെടുത്തത്. ഡോക്ടറുടെ പരാതിയില് സൈബര് പൊലീസ് അന്വേഷണം തുടങ്ങി.
വനിതാ ഡോക്ടറും കുടുംബവും വിദേശത്ത് നിന്ന് അടുത്തിടെയാണ് തിരുവനന്തപുരത്ത് തിരിച്ചെത്തിയത്. ഓണ്ലൈനിലൂടെ ഡോക്ടര് ഓഹരി ഇടപാടുകള് നടത്താറുണ്ട്. ഇതിനിടെയാണ് കഴിഞ്ഞ മാസം ആദ്യം വാട്സ് ആപ്പില് ഓണ്ലൈനില് ഓഹരി ഇടപാടിലൂടെ വന് തുക ലാഭം നേടാമെന്ന് കാട്ടി സന്ദേശം എത്തിയത്. ഇതിനായി സെറോദ എന്ന മൊബൈല് ആപ്ലിക്കേഷന് ഡൗണ്ലോഡ് ചെയ്യാന് ആവശ്യപ്പെട്ടു. തട്ടിപ്പ് സംഘവുമായി നേരിട്ട് സംസാരിച്ചിരുന്നില്ല. വാട്സ് അപ്പ് വഴി മാത്രമായിരുന്നു സന്ദേശങ്ങള്.
ആപ്പ് ഇന്സ്റ്റാള് ചെയത ഡോക്ടര് ആദ്യം അഞ്ച് ലക്ഷം രൂപ അടച്ചു. പ്രമുഖ കമ്പനികളുടെ ഓഹരികള് നല്കുമന്നായിരുന്നു തട്ടിപ്പുകാര് പറഞ്ഞിരുന്നത്. വൈകാതെ ഡോക്ടറുടെ അക്കൗണ്ടില് ലാഭവിഹിതമായി ഒരു ലക്ഷം രൂപ എത്തി. ഇതോടെ വിശ്വസം വന്ന ഡോക്ടര്ക്ക് കൂടുതല് വാഗ്ദാനങ്ങള് നല്കി. കൂടുതല് ഓഹരികള് വാഗ്ദാനം ചെയ്ത് പല തവണകളായി ഡോക്ടറില് നിന്ന് 87 ലക്ഷം രൂപ വാങ്ങി.
വാലറ്റില് അതനുസരിച്ച് ലാഭവിഹിതം കാണിച്ചെങ്കിലും പണം പിന്വലിക്കാനായില്ല. പണം ചോദിക്കുമ്പോള് ഇന്ഷുറന്സ് ഇനത്തിലും മറ്റുമായി പണം അടച്ചാലെ തുക പിന്വലിക്കാനാകൂ എന്നായിരുന്നു മറുപടി കിട്ടിയത്.
ലാഭവിഹിതത്തില് നിന്നും ഈടാക്കാന് ആവശ്യപ്പെട്ടെങ്കിലും സമ്മതിച്ചില്ല. വഞ്ചിക്കപ്പെട്ടെന്ന് മനസിലായതോടെ സൈബര് പൊലീസില് പരാതി നല്കുകയായിരുന്നു.
