ബംഗളൂരു: വിജയനഗര ജില്ലയില് ഹറപ്പനഹള്ളി താലൂക്കിലെ ടി. തുമ്ബിഗെരെ ഗ്രാമത്തില് പൊതു പൈപ്പ് വഴി വിതരണം ചെയ്ത മാലിന്യം കലർന്ന വെള്ളം ആറ് ജീവനെടുത്തു.ഗൗരമ്മ (60), മഹന്തേഷ് (45), ഹനുമന്തപ്പ (38), സുരേഷ് (30), എട്ട് മാസം പ്രായമുള്ള ആണ്കുട്ടി, നിംഗമ്മയുടെ ഗർഭസ്ഥ ശിശു എന്നിവർക്കാണ് അന്ത്യം. 50 പേർ അവശനിലയില് വിവിധ ആശുപത്രികളില് കഴിയുകയാണ്.
ഛർദിയും വയറിളക്കവും അനുഭവപ്പെട്ട് ആശുപത്രികളില് പ്രവേശിപ്പിച്ചവരാണ് മരിച്ചത്. രണ്ടാഴ്ചയിലധികമായി വിതരണം ചെയ്യുന്ന വെള്ളത്തില് മാലിന്യം കലരുന്നുണ്ടെന്ന് അധികൃതരെ അറിയിച്ചെങ്കിലും നടപടി സ്വീകരിച്ചില്ലെന്ന് ഗ്രാമവാസികള് പറഞ്ഞു.
ഏറെ അവശതയിലായ ഗർഭിണി നിംഗമ്മയെ വിദഗ്ധ ചികിത്സക്കായാണ് ദാവണ്ഗരെ ജില്ല ആശുപത്രിയില് പ്രവേശിപ്പിച്ചത്. പരിശോധനയില് മലിനജല ആഘാതത്തില് അവരുടെ കുഞ്ഞിന്റെ ജീവൻ ഗർഭപാത്രത്തില്തന്നെ പൊലിഞ്ഞതായി കണ്ടെത്തി. കൂട്ട മരണം സംഭവിച്ചശേഷം ഉണർന്ന വിജയനഗര ജില്ല പഞ്ചായത്ത് അധികൃതരും ആരോഗ്യ കുടുംബ ക്ഷേമ ഉദ്യോഗസ്ഥരും സ്ഥലം സന്ദർശിച്ചു.
