കൊച്ചി: സിപിഎം നേതാവ് എം എം ലോറന്സിന്റെ മൃതദേഹം വൈദ്യ പഠനത്തിന് കൈമാറാമെന്ന് ഹൈക്കോടതി. ഇതിനെതിരെ മകള് ആശ ലോറന്സ് നല്കിയ ഹര്ജി സിംഗിള് ബെഞ്ച് തള്ളി.
പിതാവിന്റെ മൃതദേഹം ക്രിസ്ത്യന് മതാചാരപ്രകാരം സംസ്കരിക്കണമെന്നായിരുന്നു മകളുടെ ആവശ്യം. എന്നാല് എം എം ലോറന്സിന്റെ ആഗ്രഹപ്രകാരമാണ് മൃതദേഹം മെഡിക്കല് കോളേജിന് കൈമാറിയതെന്ന് മകന് അഡ്വ. സജീവന് അറിയിച്ചിരുന്നു.
നേരത്തെ മെഡിക്കല് വിദ്യാഭ്യാസ വകുപ്പ് നടത്തിയ തെളിവെടുപ്പിലുള്പ്പെടെ രണ്ട് സാക്ഷികളെയും ഹാജരാക്കിയിരുന്നു. ഈ സാക്ഷിമൊഴികള് അവിശ്വസിക്കേണ്ടതില്ലെന്ന് പറഞ്ഞാണ് ആശ ലോറന്സിന്റെ ഹര്ജി ഹൈക്കോടതി തള്ളിയത്.ആഴ്ചകളായി കളമശേരി മെഡിക്കല് കോളേജ് മോര്ച്ചറിയില് സൂക്ഷിച്ചിരിക്കുന്ന മൃതദേഹം നടപടിക്രമങ്ങള് പൂര്ത്തിയാക്കി അനാട്ടമി വിഭാഗത്തിന് കൈമാറും. അതേസമയം കേസില് അപ്പീല് നല്കുമെന്ന് ഹര്ജിക്കാരിയായ ആശ ലോറന്സ് പറഞ്ഞു.
കഴിഞ്ഞ മാസം 21 നായിരുന്നു എം എം ലോറന്സ് മരിച്ചത്. ന്യൂമോണിയ ബാധയെ തുടര്ന്ന് കൊച്ചിയിലെ സ്വകാര്യ ആശുപത്രിയില് ചികിത്സയിലിരിക്കെ ആയിരുന്നു അന്ത്യം.
