ജോഹോര്‍: അണ്ടര്‍ 21 പുരുഷ ടീമുകള്‍ക്കായുള്ള സുല്‍ത്താന്‍ ഓഫ് ജോഹോര്‍ കപ്പ് ഹോക്കിയില്‍ ഭാരതത്തിന് വിജയത്തുടക്കം. ജപ്പാനെതിരെ ഇന്നലെ നടന്ന മത്സരത്തില്‍ രണ്ടിനെതിരെ നാല് ഗോളുകള്‍ നേടി വിജയിച്ചു. ഇതിഹാസ ഗോള്‍കീപ്പര്‍ പി.ആര്‍. ശ്രീജേഷിന്റെ പരിശീലകനായുള്ള ആദ്യ മത്സരം കൂടിയായിരുന്നു ഇത്. പുതിയ ദൗത്യത്തില്‍ ഈ മുന്‍താരത്തിന് അസ്സല്‍ വിജയത്തോടെയാണ് തുടങ്ങാന്‍ സാധിച്ചിരിക്കുന്നത്.
ഒന്നാം ക്വാര്‍ട്ടറില്‍ 12 മിനിറ്റെത്തിയപ്പോള്‍ നായകന്‍ അമീര്‍ അലി ആണ് ഭാരതത്തിനായ് ആദ്യ ഗോള്‍ നേടിയത്. രണ്ടാം പകുതിയില്‍ ജപ്പാന്റെ സുബാസ ടനാകാ നേടിയ ഗോളില്‍ അവര്‍ സമനില പിടിച്ചു. മത്സരം മൂന്നാം ക്വാര്‍ട്ടറില്‍ പുരോഗമിക്കുമ്പോള്‍ ഭാരതം ലീഡ് തിരിച്ചുപിടിച്ചു. 36-ാം മിനിറ്റില്‍ ഗുര്‍ജോത് സിങ് ആണ് ഗോള്‍ നേടിയത്. മൂന്നാം ക്വാര്‍ട്ടര്‍ അവസാനിക്കുന്നതിന് തൊട്ടുമുമ്പ് ആനന്ദ് സൗരഭിലൂടെ ഭാരതം ലീഡ് ഉയര്‍ത്തി. നാലാം ക്വാര്‍ട്ടര്‍ തുടങ്ങിയ ഉടനെയും ഭാരതം ഗോള്‍ കണ്ടെത്തി. 47-ാം മിനിറ്റില്‍ അങ്കിത് പാല്‍ ആണ് ഭാരതത്തിന് അവസാന ഗോള്‍ നേടിതന്നത്.
കളി അവസാനിക്കാന്‍ മൂന്ന് മിനിറ്റ് അവശേഷിക്കെ ജപ്പാന്‍ ഒരു ഗോള്‍ കൂടി മടക്കി. റകുസേയി യമുനേക ആയിരുന്നു സ്‌കോറര്‍. ഇന്നത്തെ രണ്ടാം മത്സരത്തില്‍ ഭാരതത്തിന് എതിരാളികള്‍ ഇംഗ്ലണ്ടാണ്.
പ്രതികരിക്കാൻ ഇവിടെ എഴുതുക: