മലയിന്കീഴ്: സാമ്പത്തിക പരാധീനതയും രോഗവും വേട്ടയാടുന്ന മലയിന്കീഴ് മച്ചേല് ആടോട്ടുകോണം മേക്കുംകര പുത്തന്വീട്ടില് ഗീതകുമാരിക്ക് ബിജെപി ദേശീയ നിര്വാഹക സമിതി അംഗം പി.കെ കൃഷ്ണദാസിന്റെ ഇടപെടലിനെ തുടര്ന്ന് പാലക്കാട് സിഎംഎന് ട്രസ്റ്റ് നിര്മ്മിച്ചു നല്കുന്ന വീടിന്റെ തറക്കല്ലിടല് കര്മം നടന്നു. ഗീതകുമാരിയും മകള് പ്ലസ് വണ് വിദ്യാര്ഥിനിയായ ഗൗരിയും മാത്രം താമസിക്കുന്ന നിലം പൊത്താറായ പഴയ വീടിന് പകരമാണ് സിഎംഎന് ട്രസ്റ്റ് പുതിയ വീട് നിര്മ്മിച്ചു നല്കുന്നത്.
പി.കെ.കൃഷ്ണദാസും സിഎംഎന് ട്രസ്റ്റ് ചെയര്മാന് പമ്പാവാസന് നായരും ചേര്ന്ന് തറക്കല്ലിടല് കര്മ്മം നിര്വഹിച്ച വീടിന്റെ നിര്മ്മാണം ആറുമാസത്തിനുള്ളില് പൂര്ത്തീകരിക്കുമെന്ന് പി.കെ.കൃഷ്ണദാസ് പറഞ്ഞു. കുടുംബത്തിന് വീട് നിര്മിച്ച് നല്കുന്നതിന് പുറമെ ഗൗരിയുടെ പഠനചിലവും സിഎംഎന് ട്രസ്റ്റ് ഏറ്റെടുക്കുമെന്ന് ചെയര്മാന് പമ്പാവാസന് നായര് പറഞ്ഞു.
ചടങ്ങില് ബിജെപി സംസ്ഥാന വൈസ്പ്രസിഡന്റ് സി.ശിവന്കുട്ടി, സംസ്ഥാന സമിതി അംഗങ്ങളായ എരുത്താവൂര് ചന്ദ്രന്, കാട്ടാക്കട സന്തോഷ്, മലയിന്കീഴ് രാധാകൃഷ്ണന്, ദക്ഷിണ മേഖല വൈസ് പ്രസിഡന്റ് മുക്കംപാലമൂട് ബിജു, മലയിന്കീഴ്, കാട്ടാക്കട മണ്ഡലം ഭാരവാഹികള്, ജനപ്രതിനിധികള്, നാട്ടുകാര് തുടങ്ങി നൂറോളംപേര് പങ്കെടുത്തു.
