കൊച്ചി: ഭാരതത്തിലെ ഏറ്റവും മികച്ച സമ്മാനത്തുകയുള്ള ചെറു ഫിലിം മേളകളിലൊന്നായ ‘അരവിന്ദം നാഷണല് ഷോര്ട്ട് ഫിലിം ഫെസ്റ്റിവല്’ പോസ്റ്റര് പ്രകാശനം സംവിധായകന് ശ്രീ.ഷാജി കൈലാസ് നിര്വഹിച്ചു. കോട്ടയത്ത് തമ്പ് ഫിലിം സൊസൈറ്റിയുടെ നേതൃത്വത്തില് 2025 മാര്ച്ച് 14, 15, 16 തീയതികളിലായാണ് ഫെസ്റ്റ് നടക്കുന്നത്.
വിഖ്യാത സംവിധായകന് അരവിന്ദന്റെ സ്മരണാര്ത്ഥമാണ് അരവിന്ദം ഷോര്ട്ട് ഫിലിം ഫെസ്റ്റ്. പോസ്റ്റര് പ്രകാശന പരിപാടിയില് തമ്പ് ഫിലിം സൊസൈറ്റി ഭാരവാഹികളായ ആര്.സാനു, ഷിജു ഏബ്രഹാം, ജയകുമാര് മൂലേടം, മനു മറ്റക്കര, അനിരുദ്ധ് ഏഴാച്ചേരി, ബിബിരാജ്, കൊച്ചി തിര ഫിലിം ക്ലബ് രക്ഷാധികാരി രമേശ് ലക്ഷ്മണ് തുടങ്ങിയവരും പങ്കെടുത്തു.
ഒരു ലക്ഷം രൂപ വീതം സമ്മാനത്തുകയും മെമന്റോയും ഉള്ള പൊതു വിഭാഗത്തിലും അര ലക്ഷം വീതം സമ്മാനത്തുകയുള്ള കാമ്പസ് വിഭാഗത്തിലുമായാണ് പുരസ്കാരങ്ങള്. മികച്ച ചിത്രം, മികച്ച നടന്, മികച്ച നടി, സംവിധായകന്, സിനിമാട്ടോഗ്രഫി, തിരക്കഥ, എന്നിവയ്ക്ക് പൊതുവിഭാഗത്തിലും കാമ്പസ് വിഭാഗത്തിലും പുരസ്കാരങ്ങള് നല്കും. കൂടാതെ നല്കിയിട്ടുള്ള വിഷയങ്ങള് അടിസ്ഥാനമാക്കി ചിത്രീകരിച്ച ഒരു മികച്ച ചിത്രത്തിനും പുരസ്കാരമുണ്ടായിരിക്കും.
അരവിന്ദം ഷോര്ട്ട് ഫിലിം ഫെസ്റ്റിവലില് പ്രദര്ശനത്തിന് തെരഞ്ഞെടുക്കുന്ന ചിത്രങ്ങള്ക്ക് പതിനായിരം രൂപ കാഷ് അവാര്ഡും മൊമന്റോയും ഉണ്ടായിരിക്കും. 2024 ജനുവരി ഒന്ന് മുതല് ഡിസംബര് 30 വരെയുള്ള കാലയളവില് പൂര്ത്തീകരിച്ച, റിലീസ് ചെയ്തതോ അല്ലാത്തതോ ആയ മുപ്പത് മിനിട്ടില് താഴെയുള്ള ഷോര്ട്ട് ഫിലിമുകള് ആണ് ക്ഷണിച്ചിട്ടുള്ളത്.
നവംബര് ഒന്ന് മുതല് ഫിലിം ഫ്രീവേ.കോം (filmfreeway.com) എന്ന വെബ്സൈറ്റില് എന്ട്രികള് സമര്പ്പിക്കാവുന്നതാണെന്ന് സംഘാടകര് പറഞ്ഞു. കൂടുതല് വിവരങ്ങള്ക്ക് 7012864173 ഈ നമ്പറില് വാട്സാപ്പ് ചെയ്യാം.
