ബെംഗളൂരു ; ഭർത്താവ് പാചകം ചെയ്യുന്നില്ല, ഒരു കപ്പ് ചായ ഉണ്ടാക്കുന്നില്ല, വീട്ടുജോലികളിൽ പോലും സഹായിക്കുന്നില്ലെന്ന് സ്ത്രീകൾ അവരുടെ ഭർത്താക്കന്മാരെക്കുറിച്ച് പരാതിപ്പെടാറുണ്ട്. എന്നാൽ ഇവിടെ വീട്ടുജോലി ചെയ്യാനറിയില്ലെന്ന് പറഞ്ഞ് ഭർത്താവ് ഭാര്യയെ വിവാഹമോചനം ചെയ്യാൻ ഒരുങ്ങുകയാണ് . ഭാര്യയ്ക്ക് കത്തി പിടിക്കാനും പഴങ്ങൾ ശരിയായി മുറിക്കാനും പോലും അറിയില്ലെന്നാണ് ഭർത്താവിന്റെ പരാതി . തന്റെ വിഷമങ്ങളെല്ലാം 28 കാരനായ ഭർത്താവ് സോഷ്യൽ മീഡിയയിൽ പങ്ക് വച്ചിട്ടുമുണ്ട് . ഈ പോസ്റ്റ് ഇപ്പോൾ വൈറലായിരിക്കുകയാണ്.
ഒരു വർഷം മുമ്പാണ് 31 കാരിയായ യുവതിയെ യുവാവ് വിവാഹം കഴിച്ചത്. ഭാര്യക്ക് വീട്ടുജോലി ചെയ്യാൻ കഴിയാത്തതിനാൽ യുവാവാണ് പാചകം ചെയ്ത് ഭക്ഷണം വിളമ്പിയിരുന്നത് . പിന്നീട് ഇതൊരു പ്രശ്നമായി മാറിയെന്നും യുവാവ് അവകാശപ്പെട്ടു. ‘ ഞാൻ പാചകത്തിന് തയ്യാറെടുക്കുമ്പോൾ, എന്റെ അമ്മ ഭാര്യയോട് പഴങ്ങൾ മുറിക്കാൻ എന്നെ സഹായിക്കാൻ ആവശ്യപ്പെട്ടു. പക്ഷേ അവൾക്ക് പഴങ്ങൾ പോലും മുറിക്കാൻ അറിയില്ല. ഒരു കത്തി പോലും ശരിയായി പിടിക്കാൻ കഴിയാത്തതിൽ അമ്മ ദേഷ്യപ്പെട്ടു. കത്തി ശരിയായി പിടിക്കാൻ കഴിയാത്തത് ശരിക്കും നാണക്കേടല്ലേയെന്നും ‘ യുവാവ് ചോദിക്കുന്നു. അവസാനം ഭാര്യയെ നാളെ പാചക ക്ലാസിൽ ചേർക്കുമെന്നും എന്നിട്ടും അവൾ പാചകം പഠിച്ചില്ലെങ്കിൽ വിവാഹമോചനം ചെയ്യുമെന്നും യുവാവ് കുറിച്ചു.
