കൊച്ചി: പാലക്കാടും ചേലക്കരയിലും ഡെമോക്രാറ്റിക് മൂവ്മെന്റ് ഓഫ് കേരളയുടെ (ഡി എം കെ) പിന്തുണയുളള സ്വതന്ത്ര സ്ഥാനാര്ത്ഥികളെ മത്സരിപ്പിക്കുമെന്ന് പിവി അന്വര് എംഎല്എ. വയനാട്ടില് സ്ഥാനാര്ത്ഥിയെ നിര്ത്തില്ല. എന്നാല്, അവിടെ ആരെ പിന്തുണയ്ക്കണമെന്ന് പിന്നീട് തീരുമാനിക്കും. അതേസമയം ഒരു അടിസ്ഥാനവുമില്ലാത്ത അന്വേഷണ റിപ്പോര്ട്ടാണ് ഇന്ന് നിയമസഭയില് വച്ചതെന്നും പിവി അന്വര് കുറ്റപ്പെടുത്തി.
സ്വര്ണക്കടത്തില് തന്റെ ആരോപണങ്ങളില് ഒരു അന്വേഷണവും നടന്നിട്ടില്ല. സ്വര്ണക്കടത്തിലെ പൊലീസ് പങ്കിനെ കുറിച്ച് തുറന്നു പറഞ്ഞവരില് നിന്നു പോലും വിവരങ്ങള് തേടിയിട്ടില്ല.
ഈ ഭരണത്തില് ഒരാള്ക്കും നീതി ലഭിക്കില്ല. ജനങ്ങള് നവംബര് 13ന് ഇതിനെതിരെ വിധിയെഴുതും. അന്ന് സഖാക്കള് കണ്ണു തുറന്നാല് മതി. ഇവിടത്തെ ബ്രാഞ്ച് സെക്രട്ടറിയും ഏരിയാ സെക്രട്ടറിയും ഏരിയാ സെന്ററും ജില്ലാ സെന്ററും ജില്ലാ സെക്രട്ടറിയും സംസ്ഥാന സെക്രട്ടറിയും പൊളിറ്റ് ബ്യൂറോയുമെല്ലാം പിണറായി വിജയനാണ്.
പിണറായി വിജയനോട് അരുത് എന്ന് പറയാനാകാത്ത തരത്തില് മാനസികമായി ഷണ്ഡീകരിക്കപ്പെട്ടവരായി സി പി എം നേതൃത്വം മാറിയെന്നും അന്വര് പരിഹസിച്ചു.
