വിജയദശമി- നായര്‍ മഹാ സമ്മേളനം എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍ ഉദ്ഘാടനം ചെയ്യുന്നു.
ചങ്ങനാശ്ശേരി: സമുദായ ശക്തി വിളിച്ചോതി എന്‍എസ്എസ്. യൂണിയന്റെ ആഭിമുഖ്യത്തില്‍ 111-ാമത് വിജയദശമിനായര്‍ മഹാസമ്മേളനം ചേര്‍ന്നു. എന്‍ എസ്എസ് ഹിന്ദു കോളേജ് ഓഡിറ്റോറിയത്തില്‍ മഹാസമ്മേളനം എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍ ഉദ്ഘാടനം ചെയ്തു.
നായര്‍ സര്‍വീസ് സൊസൈറ്റിയില്‍ പല അധികാര സ്ഥാനങ്ങളും നേടിയെടുത്തശേഷം പുറത്തു പോയവരാണെന്നത് എന്‍എസ്എസിനെ കാലങ്ങളായി അപകീര്‍ത്തിപ്പെടുത്തുന്നതെന്ന് ജി. സുകുമാരന്‍ നായര്‍ പറഞ്ഞു. സാമ്പത്തിക ക്രമക്കേട് മൂലം സംഘടനയില്‍ നിന്നു പുറത്തു പോകേണ്ടി വന്നിട്ടുള്ള വരും, അധികാരമോഹികളും സംഘടനയുടെ പ്രവര്‍ത്തനങ്ങളെക്കുറിച്ച് അറിവില്ലാത്തവരുമായ ചിലര്‍ എന്‍എസ്എസിനെതിരെ അപകീര്‍ത്തിപരമായ പ്രവര്‍ത്തനങ്ങളില്‍ ഏര്‍പ്പെടുന്നുണ്ട്. ഇത്തരം എതിര്‍പ്പുകളെയെല്ലാം സര്‍വീസ് സൊസൈറ്റി നിസാരമായി മാത്രമേ കാണുന്നുള്ളൂവെന്നും സുകുമാരന്‍ നായര്‍ പറഞ്ഞു.
എല്ലാ മത- സമുദായിക സംഘടനകളോടും, രാഷ്‌ട്രീയപ്പാര്‍ട്ടികളോടും കാലാകാലങ്ങളില്‍ ഉണ്ടാകുന്ന സര്‍ക്കാരുകളും എന്‍എസ്എസ് സൗഹൃദത്തോടെയാണ് നില കൊള്ളുന്നത്. അവരെല്ലാം നമ്മുടെ പ്രവര്‍ത്തനങ്ങളെ മതിപ്പോടു കൂടി മാത്രമേ കാണുന്നുള്ളൂ. ഇന്ന് നായര്‍ സമുദായത്തെ അവഗണിക്കത്തക്ക സാഹചര്യങ്ങള്‍ നിലനില്ക്കുന്നില്ലന്നും സുകുമാരന്‍ നായര്‍ പറഞ്ഞു.
എന്‍എസ്എസ് പ്രസിഡന്റ് ഡോ. ശശികുമാര്‍ അധ്യക്ഷത വഹിച്ചു. എന്‍എസ്എസ് ട്രഷറര്‍ അഡ്വ. എന്‍. വി. അയ്യപ്പന്‍ പിള്ള, എന്‍എസ്എസ് വൈസ് പ്രസിഡന്റ് എം. സംഗീത് കുമാര്‍, കരയോഗം രജിസ്ട്രാര്‍ വി വി ശശിധരന്‍ നായര്‍, താലൂക് യൂണിയന്‍ പ്രസിഡന്റ് ഹരികുമാര്‍ കോയിക്കല്‍, വൈസ് പ്രസിഡന്റ് എസ്. സുരേഷ് കുമാര്‍ എന്നിവര്‍ പ്രസംഗിച്ചു.
പ്രതികരിക്കാൻ ഇവിടെ എഴുതുക