കോഴിക്കോട്: നവരാത്രി സര്ഗപ്രതിഭാ പുരസ്കാര സമര്പ്പണത്തോടെ കേസരി നവരാത്രി സര്ഗോത്സവത്തിന് കൊടിയിറങ്ങി. പ്രസിദ്ധ സംഗീതജ്ഞ വൈക്കം വിജയലക്ഷ്മിക്ക് ഈ വര്ഷത്തെ പുരസ്കാരം ഗോവ ഗവര്ണര് ഡോ. പി.എസ്. ശ്രീധരന്പിള്ളയും കേന്ദ്രമന്ത്രി ജോര്ജ് കുര്യനും ചേര്ന്ന് സമ്മാനിച്ചു.
നവരാത്രി സര്ഗോത്സവ സമിതി അധ്യക്ഷ ചലച്ചിത്ര നടി വിധുബാല അധ്യക്ഷയായി. പ്രജ്ഞാ പ്രവാഹ് ദേശീയ സംയോജകന് ജെ. നന്ദകുമാര് മുഖ്യ പ്രഭാഷണം നടത്തി. പുരസ്കാര നിര്ണയ സമിതിയംഗം കാവാലം ശശികുമാര് വൈക്കം വിജയലക്ഷ്മിയെ സദസിന് അവതരിപ്പിച്ചു. വിജയലക്ഷ്മി മറുപടി പ്രസംഗം നടത്തി. സര്ഗോത്സവ സാമ്പത്തിക സമിതി അധ്യക്ഷന് എം. രാജീവ് കുമാര് സ്വാഗതം പറഞ്ഞു. തുടര്ന്ന് വൈക്കം വിജയ ലക്ഷ്മിയുടെ സംഗീതക്കച്ചേരിയുമുണ്ടായിരുന്നു.
സര്ഗാത്മക ന്യൂനപക്ഷങ്ങളാണ് സമൂഹത്തില് മാറ്റമുണ്ടാക്കുന്നതെന്ന് ഗോവ ഗവര്ണര് പി.എസ്. ശ്രീധരന് പിള്ള ഉദ്ഘാടന പ്രസംഗത്തില് പറഞ്ഞു. നമ്മുടെ രാജ്യം കീഴടക്കാന് എത്തിയ വിദേശികളുടെ ഹൃദയം കീഴടക്കിയാണ് ഭാരതം അവരെ തിരിച്ചയച്ചത്. വേദങ്ങളുടെ ആഴവും പരപ്പും കണ്ട് എനിക്ക് തലചുറ്റുന്നുവെന്ന് പറഞ്ഞ മാക്സ്മുള്ളറുടെയും കുണ്ഡലിനി ശക്തിയെപ്പറ്റി പുസ്തകമെഴുതിയ സര് ജോണ് വുഡ്രൂഫിന്റെയും ഹൃദയം ഭാരതം കീഴടക്കി.
ഭാരതത്തിന്റെ മഹത്തായ പാരമ്പര്യത്തിലും ചരിത്രത്തിലും പൈതൃകത്തിലും ലോകത്തിന്റെ എല്ലാപ്രശ്നങ്ങള്ക്കുമുള്ള പരിഹാരമുണ്ട്. ഒരു നാട് തനിമയിലേക്ക് തിരിച്ചുവരുമ്പോള് അത് ആരെയും കീഴടക്കാനല്ലെന്നും, അതിനെ സര്ഗാത്മകമായി കാണണമെന്നും അദ്ദേഹം പറഞ്ഞു.
കാഴ്ച പരിമിതി മറികടന്ന് ഉള്ക്കണ്ണു കൊണ്ട് കണ്ട് വിജയലക്ഷ്മി അവതരിപ്പിക്കുന്ന സംഗീതത്തിനെ ആദരിക്കുന്നുവെന്ന് പറഞ്ഞ കേന്ദ്രമന്ത്രി ജോര്ജ് കുര്യന്, കാലത്തിനൊപ്പം സഞ്ചരിക്കാന് കലാവിഷ്കാരങ്ങള് സഹായകമാകുന്നുവെന്നും ഭാരതത്തിന്റെ കലയും സംസ്കാരവും പൈതൃകവും സംരക്ഷിക്കാനും തലമുറകളിലേക്ക് കൈമാറാനും കേന്ദ്രത്തിലെ മോദി സര്ക്കാര് വ്യക്തമായ പദ്ധതികള് ആവിഷകരിച്ച് നടപ്പാക്കുന്നുവെന്ന് പറഞ്ഞു.
സനാതന സംസ്കാരം മനുഷ്യനെ ഉയര്ത്തുകയാണെന്നും അതിനുള്ള ക്രമീകരണങ്ങളാണ് ഉത്സവങ്ങള് ചെയ്യുന്നതെന്നും മുഖ്യപ്രഭാഷകനായ പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര് പറഞ്ഞു. ഇച്ഛാശക്തിയും ജ്ഞാനശക്തിയും നേടി ക്രിയാശക്തി വിനിയോഗിക്കാനാണ് നവരാത്രി ആഘോഷത്തിന്റെ ആത്മീയ സങ്കല്പ്പം പഠിപ്പിക്കുന്നതെന്ന് പറഞ്ഞു. ക്രിയാശക്തി പ്രകടിപ്പിക്കുകയാണ് ഭാരതം ഇപ്പോള്. സ്വയംകരുത്താര്ജ്ജിക്കണമെന്നും അല്ലെങ്കില് ശാസ്ത്രം പോലും രക്ഷയ്ക്കുണ്ടാവില്ലെന്നും അദ്ദേഹം വ്യക്തമാക്കി.
ശാസ്ത്ര ബലം മാത്രമല്ല, ശസ്ത്രബലവും വേണം. സായുധ ശക്തി ആര്ജിക്കണം, അത് സര്വ രംഗത്തും ജനങ്ങളുടെ ഉത്തരവാദിത്തമായി മാറിക്കഴിഞ്ഞിരിക്കുന്നു. മഹത്തായ പാരമ്പര്യം സംരക്ഷിക്കാന് ചെറുത്തുനില്പ്പിനു മാത്രമല്ല, പ്രത്യാക്രമണത്തിനും കടന്നാക്രമണത്തിനും നാം കരുത്താര്ജ്ജിക്കണം. നവരാത്രി തരുന്ന സന്ദേശം അതാണെന്നും നന്ദകുമാര് പറഞ്ഞു.
