ദുബായ്: സ്കോട്ട്ലന്ഡിനെതിരെ 80 റണ്സ് ജയവുമായി ദക്ഷിണാഫ്രിക്ക സെമിയോട് ഒരുപടി കൂടി അടുത്തു. വനിതാ ട്വന്റി20 ലോകകപ്പ് ക്രിക്കറ്റില് ഗ്രൂപ്പ് ഘട്ടത്തിലെ ടീമിന്റെ രണ്ടാം വിജയമാണിത്. ഗ്രൂപ്പ് ബിയില് നാല് പോയിന്റുമായി ഒന്നാം സ്ഥാനത്തേക്ക് കയറിയ ടീം സെമി സാധ്യത സജീവമാക്കി. പരാജയപ്പെട്ട സ്കോട്ട്ലന്ഡ് ലോകകപ്പില് നിന്നും പുറത്തെക്കുള്ള വഴി ഉറപ്പിച്ചു.
എതിരാളികള് സ്കോട്ട്ലന്ഡ് ആയതിനാല് ടോസ് നേടിയ ദക്ഷിണാഫ്രിക്കയ്ക്ക് രണ്ടാമതൊന്ന് ആലോചിക്കേണ്ടിവന്നില്ല. ആദ്യം ബാറ്റ് ചെയ്യാന് തീരുമാനിച്ചു. ക്യാപ്റ്റന് ലോറ വോല്വാര്ഡ്റ്റ്(40), ടസ്മിന് ബ്രിറ്റ്സ്(43), മരിസാനെ കാപ്പ്(43) സൂന് ലൂസ്(പുറത്താകാതെ 18) എന്നിവരുടെ ബലത്തില് 20 ഓവറില് അഞ്ച് വിക്കറ്റ് നഷ്ടത്തില് 166 റണ്സെടുത്തു.
ഇതിനെതിരെ സ്കോട്ട്ലന്ഡ് വെറും 86 റണ്സില് ഒടുങ്ങി. ആകെ രണ്ട് പേര്മാത്രമേ രണ്ടക്കം കടന്നുള്ളൂ. അയ്ലിസ ലിസ്റ്ററും(12) കാതെറിന് ഫ്രെയ്സറും(14). മൂന്ന് വിക്കറ്റുമായി നോങ്കുലുലേകോ മ്ലാബയും രണ്ട് വീതം വിക്കറ്റ് നേടിക്കൊണ്ട് ക്ലൂ േ്രട്യാന്, നാദിന് കെ ക്ലെര്ക് എന്നിവരും ദക്ഷിണാഫ്രിക്കന് വിജയം വേഗത്തിലാക്കി.
