കൊച്ചി: സ്വർണ്ണക്കടത്തിലും ഹവാല ഇടപാടിലും മുസ്ലീം സമുദായ അംഗങ്ങൾ പ്രവർത്തിക്കരുതെന്ന് കാണിച്ചു കൊണ്ട് പാണക്കാട് തങ്ങൾ ഫത്വാ പുറപ്പെടുവിപ്പിക്കണമെന്ന കെ ടി ജലീലിന്റെ ആവശ്യം മറ്റ് മതസ്ഥരിൽ വലിയ ആശങ്ക ഉയർത്തുന്നുവെന്ന് ബിജെപി സംസ്ഥാന വൈസ് പ്രസിഡന്റും മുൻ പി.എസ്.സി ചെയർമാനുമായി ഡോ കെ എസ് രാധാകൃഷ്ണൻ.
മലപ്പുറത്ത് എഴുപതു ശതമാനത്തിലധികം ജനങ്ങൾ മുസ്ലീങ്ങളാണെന്നും, മുസ്ലിങ്ങൾ ഭരണഘടനയെക്കാൾ പ്രാമുഖ്യം മതനിയമങ്ങൾക്കും മതാധികാരികൾക്കും നൽകുന്നു എന്നു കരുതേണ്ടി വരും. അതുകൊണ്ട് ആണല്ലോ ഇന്ത്യൻ ഭരണ ഘടനയും ശിക്ഷാ നിയമങ്ങളും കുറ്റകൃത്യമായ കാര്യങ്ങൾ തടയാനും ഫത്വാ വേണം എന്ന് കെ. ടി. ജലീൽ പറയുന്നതെന്നും ഡോ കെ എസ് രാധാകൃഷ്ണൻ പ്രതികരിച്ചു. ഫേസ്ബുക്ക് പോസ്റ്റിലൂടെയായിരുന്നു അദ്ദേഹത്തിന്റെ പ്രതികരണം.
ഫേസ്ബുക്ക് പോസ്റ്റ് വായിക്കാം:
മലപ്പുറം ജനാധിപത്യത്തിൽ നിന്നും ഫത്വായിലേയ്ക്ക്! ഇതര മതസ്ഥർ എന്ത് ചെയ്യും?
സ്വർണ്ണ കള്ളക്കടത്തിലും ഹവാല ഇടപാടിലും തീവ്രവാദ പ്രവർത്തനങ്ങളിലും മുസ്ലീം സമുദായ അംഗങ്ങൾ പ്രവർത്തിക്കരുത് എന്നുകാണിച്ചു കൊണ്ട് പാണക്കാട് തങ്ങൾ ഫത്വാ പുറപ്പെടുവിപ്പിക്കണമെന്ന് കെ ടി ജലീൽ ആവശ്യപ്പെട്ടു. അങ്ങനെ ചെയ്താൽ മലപ്പുറത്തിന് ഇപ്പോൾ വന്നു ചേർന്ന മാനഹാനിപരിഹരിക്കാൻ കഴിയുമെന്നും ജലീൽ വിശദീകരിച്ചു. മനോരമ ചാനലിന് അനുവദിച്ച ഒരു അഭിമുഖത്തിലാണ് ജലീൽ ഇക്കാര്യങ്ങൾ വിശദമാക്കിയത്.
ജലീൽ വെളിവാക്കിയ കാര്യങ്ങളിൽ നിന്നും താഴെപ്പറയുന്ന വസ്തുതകൾ അനുമാനിക്കാനാകും.
1. സ്വർണ്ണ കള്ളക്കടത്തിൽ വ്യാപരിക്കുന്ന മുസ്ലീങ്ങൾ മലപ്പുറത്ത് ധാരാളമായിട്ടുണ്ട്.
2. ഹവാല പണമിടപാട് ഉൾപ്പെടെയുള്ള സാമ്പത്തിക കുറ്റകൃത്യങ്ങൾ ചെയ്യുന്നവരും മലപ്പുറത്തെ മുസ്ലീം സമുദായത്തിലുണ്ട്.
3. മത തീവ്രവാദ ശക്തികളുമായി ബന്ധപ്പെട്ടു പ്രവർത്തിക്കുന്നവരും മുസ്ലീം ലീഗിലുണ്ട്.
4. ഇവരുടെ പ്രവർത്തനം മൂലം മലപ്പുറം ജില്ലയ്ക്ക് അവമതിപ്പുണ്ടാകുന്നു.
5. ഇതു ചെയ്യുന്ന മുസ്ലീം സമുദായ അംഗങ്ങളെ അതിൽ നിന്നു തടയാൻ പാണക്കാട് തങ്ങൾക്ക്
കഴിയും.
6. കാരണം മത നേതാവ് കൂടിയായ തങ്ങൾക്ക് മുസ്ലിം സമുദായ അംഗങ്ങൾക്ക് മേൽ മതപരമായ ആധിപത്യം ഉണ്ട്.
7. അധിപത്യം ഉപയോഗിച്ചു ഫത്വാ പുറപ്പെടുവിക്കാൻ പാണക്കാട് തങ്ങൾമാർക്ക് അധികാരമുണ്ട്.
8. എന്നാൽ പാണക്കാട് തങ്ങൾ ഈ ഹീന കൃത്യങ്ങൾ തടയാൻ ഫത്വാ പുറപ്പെടുവിച്ചിട്ടില്ല.
ജലീലിന്റെ ഈ അഭിപ്രായം ഇതര മതസ്ഥരിൽ വലിയ ആശങ്ക ഉയർത്തുന്നു. മലപ്പുറത്ത് എഴുപതുശതമാനത്തിലധികം ജനങ്ങൾ മുസ്ലീങ്ങളാണ്. മുസ്ലിങ്ങൾ ഭരണഘടനയെക്കാൾ പ്രാമുഖ്യം മതനിയമങ്ങൾക്കും മതാധികാരികൾക്കും നൽകുന്നു എന്നു വേണം കരുതാൻ. അതു കൊണ്ട് ആണല്ലോ ഇന്ത്യൻ ഭരണഘടനയും ശിക്ഷാ നിയമങ്ങളും കുറ്റകൃത്യമായ കാര്യങ്ങൾ തടയാനും ഫത്വാ വേണം എന്ന് കെ. ടി. ജലീൽ പറയുന്നത്. മലപ്പുറം ജില്ലയിൽ മുസ്ലീങ്ങൾ ഭൂരിപക്ഷമായപ്പോൾ രാഷട്രനിയമത്തേക്കാൾ പ്രാമുഖ്യം അവിട മതനിയമങ്ങൾക്ക് ലഭിക്കുന്നു. ഇക്കണക്കിന് പോയാൽ, ഏറെ താമസിയാതെ, ഖുമേനിമാരുടെ ഫത്വാ അനുസരിച്ചു ജീവിക്കാൻ ഇവിടത്തെ ഇതര മതസ്ഥർ നിർബന്ധിതരാകും എന്നാണ് പാണക്കാട് ഫത്വാ വിവാദം നൽകുന്ന അപായസൂചന. (ഡോ. കെ. എസ്. രാധാകൃഷ്ണൻ)
