കൊല്ക്കത്ത: ഇന്ത്യന് സൂപ്പര് ലീഗ് പോരാട്ടത്തില് ഇന്നലെ നടന്ന മത്സരങ്ങളില് റണ്ണറപ്പുകളായ മോഹന് ബഗാന് സൂപ്പര് ജയന്റ്സിനും ജംഷെഡ്പുര് എഫ്സിക്കും ജയം.
ഇത്തവണ ലീഗിലേക്ക് എത്തിയ മഹുമ്മദന് സ്പോര്ട്ടിങ് ക്ലബ്ബിനെ എതിരില്ലാത്ത മൂന്ന് ഗോളുകള്ക്ക് തകര്ത്താണ് മോഹന് ബഗാന് എസ്ജി സീസണിലെ രണ്ടാം ജയം നേടിയത്. നാലാം പോരാട്ടത്തിനിറങ്ങിയ ഇരു ടീമുകള്ക്കും രണ്ടാം ജയത്തിനായാണ് ഇറങ്ങിയത്. മൂന്ന് മത്സരങ്ങളില് കളിച്ച ഇരു ടീമകളും ഓരോ വിജയം മാത്രമാണ് നേടിയിരുന്നത്.
ഇരു ടീമുകള്ക്കും ഒരുപോലെ ആരാധകരുള്ള കൊല്ക്കത്തയില് നടന്ന കളിയില് ഉടനീളം ആധിപത്യം പുലര്ത്തിയത് മോഹന് ബഗാന് എസ്ജി ആണ്. മത്സരത്തിന്റെ ആദ്യപകുതിയില് തന്നെ അവര് മൂന്ന് ഗോളുകളും നേടി. എട്ടാം മിനിറ്റഇല് ജാമീ മക് ലാറെന് ഗോളടിക്ക് തുടക്കമിട്ടു. 31-ാം മിനിറ്റില് സുഭാഷിഷ് ബോസ് ലീഡ് ഇരട്ടിപ്പിച്ചു. അഞ്ച് മിനിറ്റിനകം ഗ്രെഗ് സ്റ്റേവാര്ട്ടിലൂടെ ലീഡ് കൂട്ടിയെടുത്തു. രണ്ടാം പകുതി തീര്ത്തും ഗോള് രഹിതമായി അവസാനിച്ചു. ഇന്നലത്തെ ആദ്യ മത്സരത്തില് ഈസ്റ്റ് ബംഗാളിനെയാണ് ജംഷെഡ്പുര് എഫ്സി തോല്പ്പിച്ചത്. സ്വന്തം തട്ടകത്തില് എതിരില്ലാത്ത രണ്ട് ഗോളുകള്ക്കാണ് ജംഷെഡ്പുര് ജയിച്ചത്. നാലാം മത്സരത്തിനിറങ്ങി മൂന്നാം ജയം സ്വന്തമാക്കിയ അവര് ഒമ്പത് പോയിന്റ് നേടി മൂന്നാം സ്ഥാനത്തെത്തി.
