തിരുവനന്തപുരം: ചെസ്സില്‍ കമ്പമുള്ള ചെറുപ്പക്കാര്‍ക്ക് പ്രചോദനമായി ഓടിനടന്ന് ചെസ് കളിക്കാന്‍ ഒരു വലിയ മൈതാനം തന്നെയുണ്ട്. 64 കളങ്ങളുള്ള ഒരു വലിയ മൈതാനം. അവിടെ കരുക്കള്‍ നീക്കേണ്ട. കരുക്കളും എടുത്ത് കളിക്കാരന് തന്നെ നടക്കാം. അത്രയ്‌ക്ക് വലിപ്പമുണ്ട് ഓരോ കളത്തിനും.
തിരുവനന്തപുരം നഗരത്തിൽ കനകക്കുന്ന് കൊട്ടാരത്തിലെ ക്യാപ്‌റ്റൻ ലക്ഷ്‌മി പാർക്കിലാണ്‌ ചെസ് ഗ്രൗണ്ട് എന്ന് അറിയപ്പെടുന്ന ഈ ചെസ് മൈതാനം ഒരുക്കിയിരിക്കുന്നത്. . അഞ്ചുമീറ്റർ വീതിയിലും നീളത്തിലും തയ്യാറാക്കിയതാണ് ഈ കൂറ്റൻ ചെസ് ബോർഡ്‌. വാട്ടർ അതോറിറ്റിയുടെ ഉടമസ്ഥതയിലുണ്ടായിരുന്ന പാർക്ക്‌ കോർപറേഷൻ ഏറ്റെടുത്ത്‌ സ്‌മാർട്ട്‌സിറ്റി പദ്ധതിയിൽ നവീകരിച്ചാണ്‌ ചെസ് ഗ്രൗണ്ട് നിർമിച്ചത്‌. ഒരു മൂലയ്‌ക്കിരുന്ന്‌ കളിക്കണ്ട. ചെസ്‌ബോർഡിൽ കയറിനിന്നും ഓടിനടന്നും കരുക്കൾ നീക്കാം.കരുക്കള്‍ക്കും ഉണ്ട് അത്യാവശ്യം വലിപ്പം. മുട്ടോളം ഉയരമുള്ളതാണ് കരുക്കള്‍ ഓരോന്നും.
പാർക്ക്‌ തുറക്കുന്നതുമുതൽ അടയ്‌ക്കുന്നതുവരെ ആർക്കും ചെസ് കളിക്കാം. ‘കരുക്കളും ബോർഡും നശിപ്പിക്കരുത്‌’ എന്ന് മാത്രമാണ്‌ പാർക്ക്‌ പരിപാലിക്കുന്ന കോർപറേഷന്റെ അഭ്യർഥന. അത്‌ കൃത്യമായി കളിക്കാർ പാലിക്കുന്നുമുണ്ട്‌. പതിവായി ഇവിടെ മത്സരിക്കാനെത്തുന്നവരുണ്ട്‌.
ചെന്നൈയിൽ നടന്ന ചെസ് ഒളിമ്പ്യാഡിന്റെ ഔദ്യോഗിക മീഡിയ പാർട്‌ണർ ആയിരുന്ന ‘ചെസ് ബേസ്‌ ഇന്ത്യ’ യുട്യൂബ്‌ ചാനൽ ഉൾപ്പെടെ ക്യാപ്‌റ്റൻ ലക്ഷ്‌മി പാർക്കിലെ ഓപ്പൺ ചെസ് ഗ്രൗണ്ടിനെക്കുറിച്ച്‌ റിപ്പോർട്ട്‌ ചെയ്‌തിരുന്നു. ഇന്ത്യയിൽത്തന്നെ അപൂർവമാണ്‌ ഈ ചെസ് മൈതാനം.
