തിരുവനന്തപുരം: നിയമസഭയുടെ ആദ്യദിനത്തില്‍ തന്നെ കണ്ടത് പിണറായി-സതീശന്‍ അന്തര്‍ധാരയെന്ന് മുന്‍ കേന്ദ്രമന്ത്രിയും ബി ജെ പി നേതാവുമായ വി.മുരളീധരന്‍. വയനാട്ടിലെ യഥാര്‍ഥ കണക്ക് കേന്ദ്രസര്‍ക്കാരിന് നല്‍കിയോ എന്ന് ചോദിക്കേണ്ടിടത്ത് ഭരണപക്ഷത്തിന് വിധേയപ്പെടുകയാണ് പ്രതിപക്ഷം.
മുഖ്യമന്ത്രിയോ റവന്യൂമന്ത്രിയോ വയനാട് ദുരന്തത്തിലെ യഥാര്‍ഥ നാശനഷ്ടക്കണക്കുകള്‍ സഭയില്‍ പറഞ്ഞിട്ടില്ല.കേന്ദ്രസര്‍ക്കാരിന് ശരിയായ കണക്ക് സമര്‍പ്പിച്ചിച്ചോ എന്ന് പ്രതിപക്ഷം ചോദിക്കുന്നമില്ല. വീഴ്ചകള്‍ ചോദ്യം ചെയ്യേണ്ട പ്രതിപക്ഷ നേതാവ് മുഖ്യമന്ത്രിയുടെ കുഴലൂത്തുകാരനായി മാറി- വി.മുരളീധരന്‍ പറഞ്ഞു.
വയനാട്ടില്‍ പ്രധാനമന്ത്രി നേരിട്ടെത്തിയിരുന്നു. ദുരന്തബാധിതരെ ആശ്വസിപ്പിച്ച അദ്ദേഹം, കണക്ക് സമര്‍പ്പിക്കാന്‍ സംസ്ഥാനത്തിന് നിര്‍ദേശവും നല്‍കി. ഒരു ശവം സംസ്‌കാരിക്കാന്‍ 75,000 എന്നതു പോലുള്ള കള്ളക്കണക്കല്ലാതെ മറ്റൊന്നും കേരളസര്‍ക്കാര്‍ നല്‍കിയില്ല. അതിലെ യാഥാര്‍ത്ഥ്യം പ്രതിപക്ഷം ചോദ്യംചെയ്യുന്നില്ല- വി.മുരളീധരന്‍ കുറ്റപ്പെടുത്തി.
അഞ്ച് വര്‍ഷത്തിനിടെ ദേശീയദുരന്തനിവാരണ ഫണ്ടില്‍ നിന്ന് 1471 കോടി കേരളത്തിന് അനുവദിച്ചു. ഈ വര്‍ഷത്തെ ആദ്യ ഗഡു 146 കോടി കഴിഞ്ഞ ദിവസം നല്‍കി. ദേശീയ ദുരന്തനിവാരണ ഫണ്ടില്‍ നിന്ന് സംസ്ഥാനങ്ങള്‍ക്ക് അനുവദിക്കുന്ന തുകയുടെ മാനദണ്ഡം ഉണ്ടാക്കിയത് യുപിഎ സര്‍ക്കാരാണെന്നും വി.മുരളീധരന്‍ പറഞ്ഞു.
പ്രതികരിക്കാൻ ഇവിടെ എഴുതുക: