തിരുവനന്തപുരം : സി പി എം ശ്രീകാര്യം ബ്രാഞ്ച് സമ്മേളനത്തില് വാക്കേറ്റവും കയ്യാങ്കളിയും.അംഗങ്ങള് ചേരിതിരിഞ്ഞ് പോര്വിളി നടത്തി. ഇതേത്തുടര്ന്ന് ബ്രാഞ്ച് സമ്മേളനം നിര്ത്തിവച്ചു. ശ്രീകാര്യം ലോക്കല് കമ്മറ്റിക്ക് കീഴിലെ ശ്രീകാര്യം ബ്രാഞ്ച് സമ്മേളനമാണ് കയ്യാങ്കളിയില് കലാശിച്ചത്.
പാര്ട്ടി സമ്മേളനങ്ങളില് വ്യക്തിപരമായ അധിക്ഷേപം പാടില്ലെന്ന് പാര്ട്ടി നേരത്തേ തന്നെ കത്ത് എല്ലാ കമ്മിറ്റികള്ക്കും നല്കിയിരുന്നു.പാര്ട്ടി കത്ത് നിലനില്ക്കെയാണ് ബ്രാഞ്ച് സമ്മേളനത്തില് ഏര്യാ സെക്രട്ടറിയെയും ഏര്യാ കമ്മിറ്റി അംഗത്തെയും ബ്രാഞ്ച് അംഗം സമ്മേളനത്തില് വ്യക്തിപരമായി വിമര്ശിച്ചത്. ഇത് പാടില്ലെന്ന് ലോക്കല് കമ്മിറ്റി സെക്രട്ടറി ചെറുവല്ലി രാജന് പറഞ്ഞു.
തുടര്ന്ന് പാര്ട്ടി കത്തിലെ ഭാഗം വായിച്ചു. ഇതോടെ പ്രകോപിതനായ പാര്ട്ടി അംഗം പാര്ട്ടി കത്ത് പിടിച്ചു വാങ്ങി വലിച്ചു കീറിയെറിഞ്ഞു. തുടര്ന്ന് ഏര്യാ സെക്രട്ടറിയെ പിന്തുണയ്ക്കുന്നവരും എതിര്ക്കുന്നവരും ഇരു ചേരിയായി പോര്വിളിക്കുകയും കൈയാങ്കളിയിലെത്തുകയുമായിരുന്നു. ശ്രീകാര്യം ലോക്കല് കമ്മിറ്റിയിലെ എല്ലാ ബ്രാഞ്ച് സമ്മേളനങ്ങളും മാറ്റിവച്ചിട്ടുണ്ട്.
