തിരുവനന്തപുരം: ജില്ലയില് വീണ്ടും അമീബിക് മസ്തിഷ്ക ജ്വരം സ്ഥിരീകരിച്ചു.നാവായിക്കുളം സ്വദേശി പ്ലസ് ടു വിദ്യാര്ത്ഥിക്കാണ് രോഗം സ്ഥിരീകരിച്ചത്. വിദ്യാര്ത്ഥിയെ മെഡിക്കല് കോളേജ് ആശുപത്രിയില് പ്രവേശിപ്പിച്ചു.
കഴിഞ്ഞ ഉത്രാടദിനത്തില് കുട്ടി കുളത്തില് കുളിച്ചിരുന്നു. പിന്നാലെ രോഗലക്ഷണങ്ങള് പ്രകടമായി. ഈ വിദ്യാര്ത്ഥിക്കൊപ്പം കുളത്തില് കൂടെ കുളിച്ച മറ്റ് രണ്ട് വിദ്യാര്ത്ഥികള് നിരീക്ഷണത്തിലാണ്.
രോഗകാരണമായ അമീബ കെട്ടിക്കിടക്കുന്ന വെള്ളത്തിലാണ് ജീവിക്കുന്നത്. കുളിക്കുമ്പോഴും മറ്റും മൂക്കിലെ നേര്ത്ത തൊലിയിലൂടെയാണ് അമീബ മനുഷ്യശരീരത്തില് കടക്കുന്നത്. തലച്ചോറിനെയാണ് ഗുരുതരമായി ബാധിക്കുന്നതെന്നതിനാല് മരണനിരക്ക് വളരെ കൂടുതലാണ്. രോഗാണു ശരീരത്തില് എത്തിയാല് രോഗലക്ഷണങ്ങള് പ്രകടിപ്പിക്കാന് ഒരാഴ്ചവരെ എടുക്കും. തലവേദന, പനി, ഛര്ദ്ദി എന്നിവയാണ് രോഗ ലക്ഷണങ്ങള്. അതേസമയം രോഗം ഒരാളില് നിന്നും മറ്റൊരാളിലേക്ക് പകരില്ല.
