കോട്ടയം: മന്ത്രിമാറ്റ വിഷയത്തില്‍ തോമസ് കെ തോമസിനെ ഒപ്പം നില്‍ക്കുന്ന സംസ്ഥാന പ്രസിഡണ്ടും ദേശീയ വര്‍ക്കിംഗ് പ്രസിഡണ്ടുമായ പി സി ചാക്കോക്കെതിരെ എന്‍സിപിയില്‍ പൊട്ടിത്തെറി. ദേശീയ വര്‍ക്കിംഗ് കമ്മിറ്റി അംഗം വര്‍ക്കല ബി രവികുമാര്‍, സംസ്ഥാന വൈസ് പ്രസിഡണ്ട് പി കെ രാജന്‍, ട്രഷറര്‍ പി ജെ കുഞ്ഞുമോന്‍ എന്നിവരുടെ നേതൃത്വത്തിലാണ് ചാക്കോക്കെതിരെ നിലപാട് കടുപ്പിക്കുന്നത്. കോണ്‍ഗ്രസില്‍ നിന്ന് കുടിയേറി എന്‍സിപിയുടെ തലപ്പത്തെത്തിയ ചാക്കോയ്‌ക്കെതിരെ തുടക്കത്തിലേ ഒരു വിഭാഗം നേതാക്കള്‍ക്ക് അമര്‍ഷമുണ്ട്. മന്ത്രിമാറ്റ വിഷയത്തില്‍ എ കെ ശശീന്ദ്രനെ അനുകൂലിക്കുന്ന പക്ഷമാണ് ഇപ്പോള്‍ പ്രതിഷേധം ഉയര്‍ത്തിയിരിക്കുന്നത്. ശശീന്ദ്രനെ മന്ത്രിസ്ഥാനത്തുനിന്നും മാറ്റരുതെന്ന് ആവശ്യപ്പെട്ട് ദേശീയ അധ്യക്ഷന്‍ ശരത് പവാറിന് വര്‍ക്കല രവികുമാറിന്റെ നേതൃത്വത്തിലുള്ള സംഘം കത്തയച്ചിരിക്കുകയാണ്. 7 സംസ്ഥാന ജനറല്‍ സെക്രട്ടറിമാരും ഇവര്‍ക്ക് ഒപ്പമുണ്ട്. പി സി ചാക്കോ ഏകപക്ഷീയമായാണ് തീരുമാനമെടുക്കുന്നതെന്നും കത്തില്‍ ചൂണ്ടിക്കാട്ടുന്നു.
പ്രതികരിക്കാൻ ഇവിടെ എഴുതുക