അക്ഷയ് കുമാറും രൺവീറും അയൽക്കാർ; മുംബൈയിൽ പുത്തൻ ആഢംബരവസതി സ്വന്തമാക്കി പൃഥ്വിരാജ്

മുംബൈ ബാന്ദ്രാ പാലി ഹിൽസിൽ 30 കോടിയുടെ ഡൂപ്ലെക്സ് ഫ്ളാറ്റ് സ്വന്തമാക്കി പൃഥ്വിരാജ്. മുംബൈയിൽ പൃഥ്വിരാജും ഭാര്യ സുപ്രിയ മേനോനും ചേർന്ന് സ്വന്തമാക്കുന്ന രണ്ടാമത്തെ ആഡംബര വസതിയാണിത്

മുംബൈയിലെ ബാന്ദ്രയിൽ പുത്തൻ ആഢംബര വസതി സ്വന്തമാക്കിയിരിക്കുകയാണ് മലയാളത്തിന്റെ പ്രിയതാരം പൃഥ്വിരാജ് സുകുമാരൻ. രൺവീർ സിങ്, അക്ഷയ് കുമാർ, ക്രിക്കറ്റ് താരം കെ.എൽ.രാഹുൽ തുടങ്ങി നിരവധി സെലിബ്രിറ്റികൾ താമസിക്കുന്ന പാലി ഹിൽസിലാണ് പൃഥ്വിരാജ് പുതിയ ഫ്ളാറ്റ് സ്വന്തമാക്കിയിരിക്കുന്നത്.

പൃഥ്വിരാജിന്റെയും സുപ്രിയയുടെയും ഉടമസ്ഥതയിലുള്ള പൃഥ്വിരാജ് പ്രൊഡക്‌ഷന്റെ പേരിലാണ് 2971 ചതുരശ്രയടി വിസ്തീർണമുള്ള ഫ്ലാറ്റ് രജിസ്റ്റർ ചെയ്തിരിക്കുന്നത്. 30 കോടി രൂപയ്‌ക്കാണ് പൃഥ്വിരാജ് ഈ ഫ്ളാറ്റ് വാങ്ങിയത്. 4 കാറുകൾക്കുള്ള പാർക്കിംഗ് സൗകര്യവും ഇവിടെയുണ്ട്. ഈ ഡൂപ്ലെക്സ് ഫ്ളാറ്റിനായി 1.84 കോടി രൂപയാണ് താരം സ്റ്റാംപ് ഡ്യൂട്ടി അടച്ചതെന്ന് റിയൽ എസ്റ്റേറ്റ് ഏജൻസിയായ സ്ക്വയർ യാർ‍ഡ്സ് റിപ്പോർട്ട് ചെയ്യുന്നു.

മുംബൈയിൽ പൃഥ്വിരാജും ഭാര്യ സുപ്രിയ മേനോനും ചേർന്ന് സ്വന്തമാക്കുന്ന രണ്ടാമത്തെ ആഡംബര വസതിയാണിത്. നേരത്തേ 17 കോടി രൂപ വില വരുന്ന ഒരു ഫ്ളാറ്റ് പാലി ഹില്ലിൽ പൃഥ്വിരാജ് വാങ്ങിയിരുന്നു.