ഓണത്തിന് തിയേറ്ററിലെത്തുന്ന ആസിഫ് അലി നായകനാകുന്ന ഏറ്റവും പുതിയ ചിത്രം കിഷ്‌കിന്ധാ കാണ്ഡത്തിന്റെ ട്രെയിലര്‍ പുറത്തിറങ്ങി.പുറത്തിറങ്ങി മണിക്കൂറുകള്‍കൊണ്ടുതന്നെ ടീസര്‍ രണ്ട് ദശലക്ഷത്തിലധികം പേര്‍ കണ്ടു.
റിസര്‍വ് വനത്തിന്റെ പശ്ചാത്തലത്തില്‍ ത്രില്ലര്‍ സ്വഭാവത്തിലുളള ചിത്രമാണെന്നാണ് ട്രെയ്ലര്‍ നല്‍കുന്ന സൂചന.വിജയരാഘവന്റെ അപ്പു പിള്ള എന്ന കഥാപാത്രത്തെ ചുറ്റിപറ്റിയാകും സിനിമ വികസിക്കുന്നത് എന്ന സൂചന നല്‍കുന്നതാണ് ട്രെയ്ലര്‍.
ഏറെ കാലത്തിന് ശേഷം ഋതു ഫെയിം നിഷാന്‍ മലയാളത്തിലേക്ക് മടങ്ങിയെത്തുന്നുവെന്ന പ്രത്യേകതയും ചിത്രത്തിനുണ്ട്. വനം വകുപ്പിലെ ഉയര്‍ന്ന ഉദ്യോഗസ്ഥനായ ‘സുധീര്‍’ എന്ന കഥാപാത്രത്തെയാണ് താരം അവതരിപ്പിക്കുന്നത്.’സുമദത്തന്‍’ എന്ന കഥാപാത്രമായി ജഗദീഷും ‘ശിവദാസന്‍’ എന്ന കഥാപാത്രമായി അശോകനും ചിത്രത്തില്‍ വേഷമിടുന്നു.
ഗുഡ്വില്‍ എന്റര്‍ടെയന്‍മെന്റ്‌സിന്റെ ബാനറില്‍ ജോബി ജോര്‍ജ്ജ് നിര്‍മ്മിക്കുന്ന ചിത്രം ദിന്‍ജിത്ത് അയ്യത്താന്‍ സംവിധാനം ചെയ്യുന്നു. അപര്‍ണ ബാലമുരളിയാണ് നായിക. നിഷാന്‍, വൈഷ്ണവി രാജ്, മേജര്‍ രവി, നിഴല്‍കള്‍ രവി, ഷെബിന്‍ ബെന്‍സണ്‍, കോട്ടയം രമേഷ്, ബിലാസ് ചന്ദ്രഹാസന്‍, മാസ്റ്റര്‍ ആരവ്, ജിബിന്‍ ഗോപിനാഥ് തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. ജഗദീഷ്, അശോകന്‍, നിഷാന്‍, നിഴല്‍കള്‍ രവി, ഷെബിന്‍ ബെന്‍സണ്‍ എന്നിവരുടെ കഥാപാത്രങ്ങളെ പരിചയപ്പെടുത്തുന്ന ക്യാരക്ടര്‍ പോസ്റ്ററുകളും അണിയറ പ്രവര്‍ത്തകര്‍ പുറത്തുവിട്ടിട്ടുണ്ട്.
ചിത്രം സെപ്തംബര്‍ 12 ന് തിയേറ്ററിലെത്തും.
‘വാനര ലോകം’ എന്ന ഗാനത്തിന്റെ ലിറിക്കല്‍ വീഡിയോ ഇതിനോടകം പുറത്തിറങ്ങി. ശ്യാം മുരളീധരന്റെ വരികള്‍ക്ക് മുജീബ് മജീദ് സംഗീതം പകര്‍ന്നിരിക്കുന്നു. ഗാനം ജോബ് കുര്യനും ജെമൈമയും ചേര്‍ന്നാണ് ആലപിച്ചത്. ടിബറ്റന്‍ വരികളോടെ ആരംഭിക്കുന്ന ആദ്യ മലയാള ഗാനം എന്ന പ്രത്യേകതയുമുണ്ട്.
പ്രതികരിക്കാൻ ഇവിടെ എഴുതുക: