പത്തനംതിട്ട: ജില്ലാ സെക്രട്ടേറിയറ്റ് യോഗത്തിലെ കയ്യാങ്കളിയെ തുടര്‍ന്ന് മുന്‍ എംഎല്‍എ എ പത്മകുമാറിനെയും മുതിര്‍ന്ന നേതാവ് പി.ബി.ഹര്‍ഷകുമാറിനെയും താക്കീത് ചെയ്ത് സി പി എം. സംസ്ഥാന നേതൃത്വം നിര്‍ദ്ദേശിച്ചതിനെ തുടര്‍ന്നാണ് നടപടി.
പത്തനംതിട്ട ജില്ലാ കമ്മിറ്റി ഓഫീസില്‍ മാര്‍ച്ച് 25ന് ഡോ. തോമസ് ഐസക്കിന്റെ തിരഞ്ഞെടുപ്പ് പ്രവര്‍ത്തനം വിലയിരുത്താനാണ് യോഗം ചേര്‍ന്നത്. പ്രചരണത്തിലെ വീഴ്ചകളുടെ പേരില്‍ പത്മകുമാറും ഹര്‍ഷകുമാറും തമ്മില്‍ വാക് പോരും കയ്യാകളിയും നടന്നു. തെരഞ്ഞെടുപ്പ് വേളയായതിനാല്‍ അന്ന് പാര്‍ട്ടി നടപടിയെടുത്തില്ല. എന്നാല്‍ ഐസക്കിന്റെ തോല്‍വിയില്‍ കയ്യാങ്കളിയും കാരണമാണെന്നാണ് സംസ്ഥാന നേതൃത്വത്തിന്റെ വിലയിരുത്തല്‍.
തോമസ് ഐസക്കും വി.എന്‍. വാസവനും പങ്കെടുത്ത കഴിഞ്ഞദിവസം ചേര്‍ന്ന ജില്ലാ നേതൃയോഗമാണ് താക്കീത് ചെയ്യാന്‍ തീരുമാനിച്ചത്. പാര്‍ട്ടി സമ്മേളനങ്ങള്‍ തുടങ്ങിയ വേളയിലാണ് മുതിര്‍ന്ന നേതാക്കള്‍ക്കെതിരായ നടപടി. പത്തനംതിട്ട ജില്ലാ സെക്രട്ടറി സ്ഥാനത്തേക്ക് സജീവമായി പരിഗണനയിലുണ്ടായിരുന്ന നേതാക്കളാണ് ഹര്‍ഷകുമാറും പത്മകുമാറും.
പ്രതികരിക്കാൻ ഇവിടെ എഴുതുക: