അയോദ്ധ്യ: അയോദ്ധ്യയിലെ രാംസേവക് പുരത്ത് രാമേശ്വരം മാതൃകയില്‍ പണിതീര്‍ത്ത രാമനാഥ ക്ഷേത്രത്തിന്റെ കുംഭാഭിഷേകം ഭക്തിസാന്ദ്രമായി. ക്ഷേത്രശ്രീകോവിലിനു മുകളില്‍ കലശമുറപ്പിച്ച് മുഖ്യമന്ത്രി യോഗി ആദിത്യനാഥ് പതാക ഉയര്‍ത്തി. ആര്‍എസ്എസ് അഖിലഭാരതീയ കാര്യകാരി അംഗം സുരേഷ് ജോഷിയും ചടങ്ങില്‍ സംബന്ധിച്ചു.
രാമേശ്വരവും അയോദ്ധ്യയും തമ്മിലുള്ള ആയിരക്കണക്കിന് വര്‍ഷത്തെ ആത്മീയബന്ധത്തിന്റെ നവീനമായ അഷ്ടബന്ധമുറപ്പിക്കലായാണ് ക്ഷേത്രനിര്‍മാണത്തെ വിലയിരുത്തുന്നത്. കാശി-തമിഴ് സംഗമത്തിന് പിന്നാലെ അയോദ്ധ്യാ-തമിഴ് സംഗമത്തിനും വേദിയൊരുക്കുമെന്ന് യോഗി ആദിത്യനാഥ് പറഞ്ഞു.
സീതാമാതാവിനെതേടിയുള്ള യാത്രയില്‍ രാമനാഥപുരത്താണ് ശ്രീരാമന്‍ ശിവാരാധന നടത്തിയതെന്ന് യോഗി ചൂണ്ടിക്കാട്ടി. രാവണനെ നിഗ്രഹിച്ച് മടങ്ങുമ്പോഴും രാമനാഥസ്വാമി ക്ഷേത്രത്തില്‍ അദ്ദേഹം ആരാധന നടത്തി. ഏകാത്മകതയുടെ ആത്മീയ പാരമ്പര്യമാണ് കാലങ്ങളിലൂടെ ഇങ്ങനെ മുന്നേറുന്നത്. ആരാധനാ രീതികളുടെ വൈവിധ്യങ്ങള്‍ക്കിടയിലും ഏക ഭാരതം, ശ്രേഷ്ഠ ഭാരതം എന്ന ആദര്‍ശം അരക്കിട്ടുറപ്പിക്കുകയാണ് ഇതെന്ന് യോഗി ആദിത്യനാഥ് ചൂണ്ടിക്കാട്ടി.
സ്വാര്‍ത്ഥ രാഷ്‌ട്രീയക്കാരായ ചിലര്‍ സമൂഹത്തെ വിഭജിക്കാന്‍ ശ്രമിച്ചുകൊണ്ടിരിക്കുകയാണ്. തെക്കെന്നും വടക്കെന്നും പറഞ്ഞ്, ജാതിയുടെ പേരില്‍ ഒക്കെ ഭിന്നിപ്പിക്കാന്‍ നീക്കം നടക്കുന്നു. അത്തരം ശ്രമങ്ങള്‍ക്കുള്ള മറുപടിയാണ് അയോദ്ധ്യയിലെ രാമനാഥക്ഷേത്രത്തിന്റെ കുംഭാഭിഷേകം. അദ്ദേഹം പറഞ്ഞു.
ഭാരതം ഒന്നാണെന്നതിന് ഈ നാടിന്റെ പുരാതന സാഹിത്യം തെളിവാണ്. നമ്മുടെ വേദഗ്രന്ഥങ്ങള്‍ തെളിവാണ്. സംന്യാസിമാരുടെയും ക്ഷേത്രങ്ങളുടെയും വ്യാപകമായ സ്വാധീനം തെളിവാണ്. ഭരണകൂടങ്ങള്‍ വ്യത്യസ്തമായിരിക്കാം, എന്നാല്‍ ഭാരതം സാംസ്‌കാരികമായി ഒന്നാണ്. അയോദ്ധ്യയിലെ രാംലല്ലയെ ദര്‍ശിക്കാന്‍ മൂന്ന് കോടിയിലധികം ഭക്തരാണ് എത്തിയത്. ലോകത്തിലെ ഏറ്റവും മനോഹരമായ ആത്മീയ നഗരമായി അയോദ്ധ്യ മാറുകയാണ്, യോഗി ആദിത്യനാഥ് പറഞ്ഞു.
തുടര്‍ന്ന് അശോക് സിംഘല്‍ ജന്മവാര്‍ഷികത്തോടനുബന്ധിച്ചുള്ള പരിപാടിയിലും യോഗി ആദിത്യനാഥ് പങ്കെടുത്തു.
പ്രതികരിക്കാൻ ഇവിടെ എഴുതുക: