കോട്ടയം: സിപിഎമ്മിന്റെ ‘ക്യാപ്‌സ്യൂള്‍ ഫാക്ടറികള്‍’ക്ക് ഏതാനും ദിവസമായി അവധിയാണ്. പി വി അന്‍വറിന്റെ വെളിപ്പെടുത്തലുകളെ തുടര്‍ന്ന് പഴയ അച്ചിലുള്ള ക്യാപ്‌സ്യൂളുകള്‍ വിറ്റഴിക്കാന്‍ കഴിയാത്തതിനാല്‍ പുതിയ ക്യാപ്‌സുകള്‍ നിര്‍മ്മിക്കുന്നതിനെക്കുറിച്ചാണ് സിപിഎം സൈബര്‍ കടന്നലുകള്‍ തലപുകയ്‌ക്കുന്നത്.
രാഷ്‌ട്രീയ ശത്രുക്കളെ നേരിടാന്‍ തങ്ങള്‍തന്നെ പോറ്റിവളര്‍ത്തിയ അന്‍വര്‍ ഇപ്പോള്‍ തങ്ങളെ തന്നെ തിരിച്ചുകടിക്കുന്ന സ്ഥിതിവിശേഷത്തെ എങ്ങനെ നേരിടണമെന്ന് തിരിച്ചറിയാനാവാത്തതിനാല്‍ സോഷ്യല്‍മീഡിയാ പ്രതികരണങ്ങള്‍ കാര്യമായി ഉണ്ടാകുന്നില്ല. അന്‍വറിന്റെ രാഷ്‌ട്രീയ ഗുണ്ടായിസത്തിനെതിരെ സോഷ്യല്‍ മീഡിയയില്‍ ജയ് വിളിച്ചിരുന്നവരെയൊന്നും ഏതാനും ദിവസമായി കാണുന്നുമില്ല.
പാര്‍ട്ടി അംഗമല്ലെന്നുള്ളത് പ്രിവിലേജ് ആയിക്കണ്ട് ആര്‍ക്കുമെതിരെയും എന്തും പറയാന്‍ പി വി അന്‍വര്‍ ധൈര്യം കാട്ടിയിരുന്നു. ഇക്കാര്യങ്ങള്‍ എല്ലാം കണ്ടും കേട്ടും ആസ്വദിച്ചിരുന്ന പാര്‍ട്ടി ഇപ്പോള്‍ തങ്ങള്‍ക്കെതിരെ അള്ളു വയ്‌ക്കുന്നതുകണ്ട് അന്ധാളിച്ചിരിക്കുകയാണ്.
പണ്ടൊക്കെ അന്‍വര്‍ ന്യായമേ പറയൂ എന്ന നിലപാട് സ്വീകരിച്ചിരുന്ന പാര്‍ട്ടിക്ക് ഇപ്പോഴത്തെ വെളിപ്പെടുത്തലുകള്‍ തള്ളിപ്പറയാന്‍ കഴിയുന്നില്ല. തൊണ്ടയില്‍ പുഴുത്തത് പതുക്കെ പതുക്കെ ഇറക്കിക്കൊണ്ടിരിക്കുന്ന ഗതികേടിലായി പാര്‍ട്ടി.
പാര്‍ട്ടിയിലെ പുഴുക്കുത്തുകള്‍ക്കെതിരെ ഇനിയും ഏറെ തെളിവുകള്‍ തന്റെ കൈവശമുണ്ടെന്ന് അന്‍വര്‍ ഭീഷണിപ്പെടുത്തിയിട്ടുമുണ്ട്. അത് ഏതൊക്കെ ഘട്ടത്തില്‍ പുറത്തുവിടും എന്നറിയാതെ കടുത്ത നിലപാട് സ്വീകരിക്കാന്‍ മടിക്കുകയാണ് സിപിഎം. മനോനില തെറ്റിയ ഒരു ഇടവക വികാരിയുടെ കഥയുണ്ട്, എന്തൊക്കെ കുമ്പസാര രഹസ്യങ്ങള്‍ ആവും അദ്ദേഹം ഇനി വിളിച്ചു പറയുക എന്നറിയാത്ത വിഭ്രാന്തിയില്‍ കഴിയുന്ന ഇടവക പ്രമാണികളുടെ അവസ്ഥയിലായി സിപിഎം.
പ്രതികരിക്കാൻ ഇവിടെ എഴുതുക: