ചാണകം കൊണ്ട് നിർമ്മിച്ച പരിസ്ഥിതി സൗഹൃദ ഗണേശ വിഗ്രഹങ്ങൾ ജനപ്രീതി നേടുന്നു ; പ്ലാസ്റ്റർ ഓഫ് പാരീസ് , കെമിക്കൽ പെയിൻ്റുകൾക്ക് ഇനി വിട

ഹൈദരാബാദ്: പാരിസ്ഥിതിക സുസ്ഥിരതയിലേക്കുള്ള നീക്കത്തിന്റെ ഭാഗമായി പശുവിന്റെ ചാണകത്തിൽ നിർമ്മിച്ച പരിസ്ഥിതി സൗഹൃദ ഗണേശ വിഗ്രഹങ്ങൾ പ്രചാരം നേടുന്നു. ഈ സംരംഭം ഹരിത ആഘോഷങ്ങളെ പ്രോത്സാഹിപ്പിക്കുക മാത്രമല്ല പരമ്പരാഗത ഉത്സവങ്ങളിൽ പരിസ്ഥിതി ബോധമുള്ള ആചാരങ്ങളുടെ ആവശ്യകത ഉയർത്തിക്കാട്ടുകയും ചെയ്യുന്നു.

ഗ്രാമങ്ങളിൽ ഇന്ധനം, വളം, നിർമ്മാണം എന്നിവയ്‌ക്കായി സാധാരണയായി ഉപയോഗിക്കുന്ന ചാണകം ഇപ്പോൾ ഗണപതിയുടെ വിശുദ്ധ വിഗ്രഹങ്ങളായി രൂപാന്തരപ്പെട്ടിരിക്കുന്ന കാഴ്ചയാണ് സംസ്ഥാനത്ത് കാണാനാകുക. പ്ലാസ്റ്റർ ഓഫ് പാരീസ് , കെമിക്കൽ പെയിൻ്റുകൾ തുടങ്ങിയ പരമ്പരാഗത വസ്തുക്കളിൽ നിന്ന് ബയോഡീഗ്രേഡബിൾ വസ്തുക്കളിലേക്കുള്ള ഈ മാറ്റം ഒരു നല്ല പാരിസ്ഥിതിക മാറ്റമായി കാണുന്നു.

തങ്ങൾ ഈ വിഗ്രഹങ്ങൾ നിർമ്മിക്കാൻ തുടങ്ങിയത് പ്രാഥമികമായി ഞങ്ങളുടെ ഗൗശാലയ്‌ക്ക് ധനസഹായം നൽകാനാണ്. കഴിഞ്ഞ 10 വർഷമായി ഞങ്ങൾ ഗണേശ വിഗ്രഹങ്ങൾ നിർമ്മിക്കുന്നുണ്ടെന്നും കരകൗശല വിദഗ്ധനും സംരംഭത്തിന്റെ സ്ഥാപകനുമായ ശ്രീനിവാസ പ്രസാദ് പറഞ്ഞു.

ഇതിനു പുറമെ ഇവ ആന്ധ്രപ്രദേശിലേക്കും അഹമ്മദാബാദിലേക്കും മറ്റ് സ്ഥലങ്ങളിലേക്കും അയയ്‌ക്കുന്നു. ചാണകത്തിന് ആൻ്റി ബാക്ടീരിയൽ ഗുണങ്ങളുണ്ട്. ഞങ്ങൾ ഇവിടെ സ്ത്രീകൾക്ക് ജോലി അവസരങ്ങൾ നൽകുകയും സ്ത്രീ ശാക്തീകരണത്തെ പിന്തുണയ്‌ക്കുകയും ചെയ്യുന്നു. ഈ ഗണേശ വിഗ്രഹങ്ങൾ ഉൾപ്പെടെ 30-ഓളം ഉൽപ്പന്നങ്ങൾ ഞങ്ങൾ ചാണകത്തിൽ നിന്ന് നിർമ്മിക്കുന്നുണ്ടെന്നും അദ്ദേഹം പറഞ്ഞു.

വിഗ്രഹങ്ങൾ നിർമ്മിക്കുന്ന പ്രക്രിയയെ പ്രസാദ് കൂടുതൽ വിശദമായി വിവരിച്ചു. ചാണകം ആദ്യം നന്നായി ഉണക്കിയ ശേഷം പൊടിച്ച് ലസോഡ എന്ന മറ്റൊരു പദാർത്ഥവുമായി കലർത്തുന്നു. ഇത് ഒരു അച്ചിൽ സ്ഥാപിക്കുകയും പിന്നീട് നിറങ്ങൾ കൊണ്ട് അലങ്കരിക്കുകയും ചെയ്യുന്നു. ചാണകം ഉണങ്ങാൻ ഏകദേശം 15-20 ദിവസമെടുക്കും സാധാരണയായി വേനൽക്കാലത്താണ് ഇത് ചെയ്യുന്നത്.

അതേ സമയം ഈ വിഗ്രഹങ്ങൾ വളരെ സ്ഥിരതയുള്ളതും എളുപ്പത്തിൽ പൊട്ടാത്തതുമാണ്. 2 അടി വരെ ഉയരമുള്ള വിഗ്രഹങ്ങൾ ഇവർ നിർമ്മിക്കുന്നുണ്ട്. ഇതിന്റെ വില 100, 200 രൂപ മുതൽ 1500 വരെയാണെന്നും അദ്ദേഹം പറഞ്ഞു.

ചെളിയിൽ നിർമ്മിച്ച പരമ്പരാഗത പരിസ്ഥിതി സൗഹൃദ ഗണേശ വിഗ്രഹങ്ങളിൽ നിന്ന് വ്യത്യസ്തമായി ചാണക വിഗ്രഹങ്ങൾ അധിക ആനുകൂല്യങ്ങൾ വാഗ്ദാനം ചെയ്യുന്നു. ചാണകത്തിലെ കാർബണിന്റെ അംശം മണ്ണിനെ സമ്പുഷ്ടമാക്കുന്നു.

ഉത്സവം സമാപിച്ചുകഴിഞ്ഞാൽ ഈ വിഗ്രഹങ്ങൾ മലിനീകരണം ഉണ്ടാക്കാതെ വെള്ളത്തിൽ ലയിക്കുകയും സ്വാഭാവികമായി സസ്യങ്ങൾക്ക് പോഷകങ്ങൾ നൽകുകയും ചെയ്യുന്നു.