തരൺ തരൺ ജില്ലയിൽ നിന്ന് ചൈന നിർമ്മിത ഡ്രോൺ ബിഎസ്എഫ് വീണ്ടെടുത്തു ; ഡ്രോണിൽ മയക്കുമരുന്ന് കെട്ടിവച്ച നിലയിൽ

ഛണ്ഡിഗഡ്: തരൺ തരൺ ജില്ലയിൽ നിന്ന് ബിഎസ്എഫ് ചെറിയ ഡ്രോണും മയക്കുമരുന്ന് പാക്കറ്റും കണ്ടെടുത്തു. പ്രത്യേക വിവരത്തിന്റെ അടിസ്ഥാനത്തിലാണ് സൈന്യം തിരച്ചിൽ നടത്തിയത്.

പ്രദേശത്തെ രാധ സ്വാമി സത്സംഗിന്റെ പരിസരത്ത് നിന്ന് ഒരു ചെറിയ ഡ്രോണും ഒരു പാക്കറ്റ് ഹെറോയിനും (മൊത്തം ഭാരം- 536 ഗ്രാം) രാവിലെ 8:10 ഓടെ വീണ്ടെടുത്തതായി സൈന്യം തന്നെയാണ് അറിയിച്ചത്. മയക്കുമരുന്ന് ടേപ്പ് കൊണ്ട് പൊതിഞ്ഞ നിലയിലായിരുന്നു.

കൂടാതെ പാക്കറ്റിൽ ഘടിപ്പിച്ചിരിക്കുന്ന ഒരു പ്ലാസ്റ്റിക് മോതിരവും കണ്ടെത്തി. കണ്ടെടുത്ത ഡ്രോൺ ചൈന നിർമ്മിത DJI MAVIC 3 ക്ലാസിക് ആണെന്ന് തിരിച്ചറിഞ്ഞിട്ടുണ്ട്.

കഴിഞ്ഞ മാസമാദ്യം പഞ്ചാബിലെ തരൺ തരൺ ജില്ലയുടെ അതിർത്തി പ്രദേശത്ത് സംയുക്ത തിരച്ചിൽ നടത്തുന്നതിനിടെ സുരക്ഷാ സേന ഒരു ഡ്രോൺ കണ്ടെടുത്തിരുന്നു.