തൃശൂര്: ഇരിങ്ങാലക്കുട നഗരസഭയുടെ ശുചിത്വ മിഷന് അംബാസിഡര് പദവി നടന് ഇടവേള ബാബു ഒഴിഞ്ഞു.ലൈംഗികാരോപണ പരാതിയില് കേസെടുത്ത പശ്ചാത്തലത്തിലാണ് ഇത്.
കേസെടുത്തതിനെ തുടര്ന്ന് ഇടവേള ബാബുവിനെ പദവിയില് നിന്ന് ഒഴിവാക്കണമെന്ന് ബിജെപിയില് നിന്നും പൊതുസമൂഹത്തില് നിന്നും ആവശ്യമുയര്ന്നിരുന്നു. കഴിഞ്ഞ ഒരാഴ്ചയായി തന്റെ പേരില് ഉയരുന്ന ആരോപണങ്ങളുടെ പശ്ചാത്തലത്തില് ഇരിഞ്ഞാലക്കുട നഗരസഭയുടെ ‘ശുചിത്വ അംബാസിഡര്’ എന്ന പദവിയില് നിന്ന് സ്വയം ഒഴിവാകുന്നു എന്നാണ് ഇടവേള ബാബു അറിയിച്ചത്.
കേസ് നിയമപരമായി മുന്നോട്ട് പോകേണ്ടതിനാല് ഔദ്യോഗിക സ്ഥാനത്തുനിന്നും ഒഴിവാക്കി തരണം.തന്റെ പേരില് ആരോപിച്ചിട്ടുള്ള കുറ്റങ്ങളില് ഇരിഞ്ഞാലക്കുട നഗരസഭക്ക് ഒരു തരത്തിലും കളങ്കം ഉണ്ടാകരുതെന്ന് ആത്മാര്ഥമായി ആഗ്രഹിക്കുന്നതുകൊണ്ടാണ് ഇത്തരത്തില് ഒരു തീരുമാനത്തിലേക്ക് എത്തിയതെന്ന് ഇടവേള ബാബു വെളിപ്പെടുത്തി.
