തിരുവനന്തപുരം: ദ്വാപരയുഗ സ്മരണകളുണര്ത്തി ശ്രീകൃഷ്ണ ജയന്തി ദിനത്തില് ഉണ്ണിക്കണ്ണന്മാര് നഗരവീഥികള് കയ്യടക്കി. പാട്ടും ഭജനയും ആഘോഷവുമായി നഗരം ഗോകുലസന്ധ്യയിലാറാടി. അരമണികിലുക്കി ശ്രീകൃഷ്ണ നാമങ്ങള് ഉരുവിട്ട് മഞ്ഞപ്പട്ടുടുത്ത് മയില്പ്പീലി ചൂടിയ നിരവധി ഉണ്ണികണ്ണന്മാര് നഗരവീഥികളില് പിച്ചവച്ചു. പുണ്യപുരാണ കഥാപാത്രങ്ങളെ അനുസ്മരിപ്പിക്കുന്ന നിശ്ചലദൃശ്യങ്ങള്, മുത്തുക്കുടയേന്തിയ യുവതികള്, ഭജനസംഘങ്ങള് എന്നിവ അകമ്പടിയേകി. പിഞ്ചുബാലികാ ബാലന്മാര് നിരനിരയായി ശ്രീകൃഷ്ണനാമ ജപങ്ങളുടെ അകമ്പടിയോടെ കൈകളില് ഓടക്കുഴലുമായി നഗരവീഥികളില് ബാലലീലകളുമായി ഓടിക്കളിച്ചു.
ബാലഗോകുലമുയര്ത്തിയ ‘പുണ്യമീ മണ്ണ് പവിത്രമീ ജന്മം’ എന്ന ആഹ്വാനം അനന്തപുരി ഏറ്റെടുത്തു. വൈകിട്ട് മൂന്നുമണിയോടെ 10 കേന്ദ്രങ്ങളില് നിന്നും ചെറു ശോഭായാത്രകള് പാളയം മഹാഗണപതി ക്ഷേത്രത്തിന് മുന്നില് എത്തി സംഗമിച്ച് മഹാശോഭായാത്രയായി ആറ് മണിയോടെ പഴവങ്ങാടി ഗണപതിക്ഷേത്രമുന്നില് മഹാ ആരതി സമര്പ്പിച്ച് അവസാനിച്ചു. തുടര്ന്ന് ആറ്റുകാല് ദേവീ ക്ഷേത്രട്രസ്റ്റ് ഒരുക്കിയ അവല്പ്പൊതിയും ഉണ്ണിയപ്പവും പ്രസാദമായി ശോഭായാത്രയില് പങ്കെടുത്ത ഉണ്ണിക്കണ്ണന്മാര്ക്കും ഗോപികമാര്ക്കും വിതരണം ചെയ്തു.
സംഗമ ശോഭായാത്ര കേന്ദ്രമന്ത്രി ജോര്ജ്ജ് കുര്യന് ഉദ്ഘാടനം ചെയ്തു. ബാലഗോകുലം സംസ്ഥാനസംഘടനാ സെക്രട്ടറി എ. രഞ്ജുകുമാര് ശ്രീകൃഷ്ണ ജയന്തി സന്ദേശം നല്കി. മഹാനഗര് രക്ഷാധികാരി ഡോ. ശ്യാംമോഹന് അധ്യക്ഷത വഹിച്ചു. കേരള സര്വകലാശാല വൈസ് ചാന്സലര് ഡോ. മോഹന്കുന്നുമ്മല് ഗോകുലപതാക കൈമാറി. വയനാട്ടില് ഉരുള്പൊട്ടല് ദുരന്തത്തില് ജീവന് നഷ്ടമായവര്ക്ക് കുമാരി ചൈതന്യാതമ്പി ശ്രദ്ധാഞ്ജലി അര്പ്പിച്ചു. മുതിര്ന്ന ആര്എസ്എസ് പ്രചാരകന് എസ്. സേതുമാധവന്, മുന്കേന്ദ്രമന്ത്രി വി. മുരളീധരന്, തിരുവിതാംകൂര് രാജകുടുംബാംഗം ആദിത്യവര്മ്മ, ചെങ്കല് രാജശേഖരന് നായര്, കെ.വി. രാധാകൃഷ്ണന് എന്നിവര് സാന്നിഹിതരായി.
ആഘോഷ സമിതി ഭാരവാഹികളായ എം.ഗോപാല്, ജി. സുരേഷ്കുമാര്, കെ.വി.രാധാകൃഷ്ണന്, എം. മഹേശ്വരന്, കെ. രാജശേഖരന്, പി. സുധാകരന്, കെ. ജയകുമാര്, സുനില്.കെ,റ്റി. സന്തോഷ്, അഡ്വ.മഞ്ജു, അപര്ണ്ണ, കെ.എസ്. ഷാജി, രാജീവ്, ടി. നന്ദകുമാര്, ബിജെപി സംസ്ഥാന സെക്രട്ടറി എസ്. സുരേഷ്, ജില്ലാ പ്രസിഡന്റ് വി.വി. രാജേഷ്, ബിജെപി കൗണ്സിലര്മാര് തുടങ്ങിയവര് ശോഭായാത്രയ്ക്ക് നേതൃത്വം നല്കി.
ജില്ലയിലെമ്പാടും ബാലഗോകുലത്തിന്റെ ആഭിമുഖ്യത്തില് ശോഭായാത്രകള് സംഘടിപ്പിച്ചു. പാറശ്ശാല, നെയ്യാറ്റിന്കര, കാട്ടാക്കട, ബാലരാമപുരം, നെടുമങ്ങാട്, പാലോട്, വെമ്പായം, പോത്തന്കോട്, വെഞ്ഞാറമൂട്, കല്ലറ, കിളിമാനൂര്, ആറ്റിങ്ങല്, വര്ക്കല തുടങ്ങിയ മേഖലകളിലെല്ലാം ഉണ്ണിക്കണ്ണന്മാരുടെ വേഷമണിഞ്ഞ നൂറുകണക്കിന് ബാലികാബാലന്മാരും അമ്മമാരും ഘോഷയാത്രകളില് പങ്കെടുത്തു.
ജില്ലയിലെ പ്രധാന ശ്രീകൃഷ്ണക്ഷേത്രങ്ങളിലെല്ലാം അഭൂതപൂര്വമായ തിരക്കാണ് ഇന്നലെ അനുഭവപ്പെട്ടത്. നെയ്യാറ്റിന്കര ശ്രീകൃഷ്ണക്ഷേത്രം, മലയിന്കീഴ് ശ്രീകൃഷ്ണസ്വാമി ക്ഷേത്രം, പേരൂര്ക്കട അമ്പലംമുക്ക് ശ്രീകൃഷ്ണ ക്ഷേത്രം, പിരപ്പന്കോട് ശ്രീകൃഷ്ണക്ഷേത്രം, ആറ്റിങ്ങല് വീരകേരളപുരം ശ്രീകൃഷ്ണസ്വാമി ക്ഷേത്രം, വര്ക്കല ജനാര്ദ്ദനസ്വാമി ക്ഷേത്രം എന്നിവിടങ്ങളിലെല്ലാം പ്രത്യേക പൂജകളും നടന്നു.
