തിരുവനന്തപുരം: വെളിപ്പെടുത്തലുകളും ആരോപണങ്ങളും ധാരാളം വരുമെന്നും അതിലെല്ലാം പലതാത്പര്യങ്ങളുണ്ടാകുമെന്നും നടന്‍ മണിയന്‍പിള്ള രാജു. നടി മിനു മുനീര്‍ ആരോപണവുമായി രംഗത്തെത്തിയതിന് പിന്നാലെയാണ് നടന്‍ മണിയന്‍പിള്ള രാജുവിന്റെ പ്രതികരണം. പണം തട്ടാന്‍ വേണ്ടിയും അവസരം കിട്ടാത്തതില്‍ ദേഷ്യമുള്ളവരും അടക്കം ആരോപണവുമായി വരും. എല്ലാത്തിന്റെയും യഥാര്‍ത്ഥ വസ്തുതകള്‍ പുറത്തുകൊണ്ടുവരാന്‍ അന്വേഷണം വേണമെന്നും മണിയന്‍പിള്ള രാജു പറഞ്ഞു.
‘എല്‍സമ്മ എന്ന ആണ്‍കുട്ടി’ എന്ന സിനിമയില്‍ മിന്നുവിനൊപ്പം അഭിനയിച്ചിട്ടുണ്ടെന്നും തനിക്ക് എതിരായ ആരോപണം തെറ്റാണെന്നും രാജു പറഞ്ഞു. തെറ്റുകാരനാണെങ്കില്‍ തന്നെയും ശിക്ഷിക്കണം. എല്ലാ ആരോപണങ്ങളും സര്‍ക്കാര്‍ അന്വേഷിക്കണം. വഴിവിട്ട രീതിയില്‍ അമ്മയില്‍ അംഗത്വം എടുക്കാന്‍ സാധിക്കില്ല. ആരോപണവിധേയരില്‍ ഇതില്‍ ഉള്‍പ്പെടാത്തവരും ഉള്‍പ്പെട്ടവരും ഉണ്ടാകും. ഇതിന്റെ പിന്നില്‍ പല ഉദ്ദേശ്യങ്ങള്‍ ഉള്ളവരുണ്ടാകും. പൈസ അടിക്കാനുള്ളവര്‍, നേരത്തെ അവസരം ചോദിച്ച് കൊടുക്കാതിരുന്നവരൊക്കെ ഇത് പറയും. പക്ഷെ ഇവയില്‍ ഒരു അന്വേഷണം ആവശ്യമുണ്ട്. അല്ലെങ്കില്‍ ആള്‍ക്കാര്‍ ഇങ്ങനെ വന്നോണ്ടിരിക്കും. കള്ളപ്പരാതിയുമായിട്ട് ആരെങ്കിലും വരുന്നുണ്ടെങ്കില്‍ അതും നോക്കണം. എഎംഎംഎയുടെ സ്ഥാപക അംഗമാണ് താന്‍. കഴിഞ്ഞ കമ്മിറ്റിയില്‍ വരെ വൈസ് പ്രസിഡന്റ് ആയിരുന്നു. മെമ്പര്‍ഷിപ്പിന് വേണ്ടി പൈസ വാങ്ങിക്കുക എന്നത് അറിവില്‍ ഇല്ലെന്നും മണിയന്‍പിള്ള രാജു പറഞ്ഞു.
മണിയന്‍പിള്ള രാജുവും ഇടവേള ബാബുവും ലൈംഗിക ചുവയോടെ സംസാരിച്ചുവെന്നും മണിയന്‍പിള്ള രാജുവില്‍ നിന്നുണ്ടായ മോശം അനുഭവത്തെപ്പറ്റി അന്നുതന്നെ ഒപ്പമുണ്ടായിരുന്ന നടി ഗായത്രി വര്‍ഷയോട് വെളിപ്പെടുത്തിയിരുന്നെന്നുമാണ് മിനു മുനീറിന്റെ ആരോപണം.
പ്രതികരിക്കാൻ ഇവിടെ എഴുതുക: