മുംബൈ: ദിവസങ്ങള്ക്കകം 386 കോടിയോളം രൂപ കളക്ഷന് നേടി ശ്രദ്ധ കപൂര് നായികയായ സ്ത്രീ2 എന്ന പ്രേതകഥയെ ആസ്പദമാക്കിയുള്ള ഹിന്ദി സിനിമ കുതിക്കുകയാണ്. കഴിഞ്ഞ കുറച്ചുനാളുകളായി പരാജയം മാത്രം ഏറ്റുവാങ്ങിയ ഹിന്ദി സിനിമയുടെ ജാതകം തന്നെ മാറ്റിയെഴുതുകയാണ് ഈ ശ്രദ്ധ കപൂര് ചിത്രം. നായികയ്ക്കും കഥയ്ക്കുമാണ് സിനിമയില് പ്രാധാന്യം. രാജ് കുമാര് റാവു ആണ് നായകന്. ചന്ദേരി എന്ന ഗ്രാമത്തെ വീണ്ടും പ്രേതബാധ പിടികൂടുന്നതാണ് കഥ. സ്ത്രീകളെ തടങ്കലില് വെയ്ക്കുന്ന തലയില്ലാത്ത പിശാച്. അതിനോടുള്ള പോരാട്ടമാണ് സിനിമയുടെ കാതല്. സ്ത്രീയിലെ ശ്രദ്ധ കപൂറിന്റെ പ്രകടനത്തെ കുറിച്ച് മികച്ച അഭിപ്രായങ്ങളാണ് പ്രേക്ഷകർ സമൂഹമാദ്ധ്യമങ്ങളിലൂടെ പങ്കുവക്കുന്നത്.
അമർ കൗശികാണ് സ്ത്രീയുടെ സംവിധായകന്. ആഗസ്റ്റ് 15-നാണ് തിയേറ്ററുകളിലെത്തിയത്. ചിത്രത്തിന്റെ ആദ്യ ഭാഗത്തേത് പോലെ തന്നെ രണ്ടാം ഭാഗത്തിനും പ്രേക്ഷകർക്കിടയിൽ വലിയ സ്വീകാര്യതയുണ്ട്. ഇപ്പോള് ഹിന്ദി സിനിമാചരിത്രത്തിലെ തന്നെ ഏറ്റവും കൂടുതല് കളക്ഷന് നേടുന്ന ഏഴാമത്തെ ചിത്രമായി സ്ത്രീ2 മാറി. 2016ലെ അമീര് ഖാന് ചിത്രമായ ‘ഡങ്കല്’ (374 കോടി കളക്ഷന്), സഞ്ജയ് ദത്തിന്റെ ജീവിതം അടിസ്ഥാനമാക്കി രാജ് കുമാര് ഹിരാനി സംവിധാനം ചെയ്ത സഞ്ജു (342 കോടി കളക്ഷന്) എന്നിവയെ സ്ത്രീ2 പിന്നിലാക്കി കഴിഞ്ഞു. വൈകാതെ ഈ സിനിമ 500 കോടി ക്ലബ്ബിലെത്തുമെന്ന് കരുതുന്നു.
ഇതോടെ ശ്രദ്ധ കപൂറിന്റെ ജനപ്രീതി വര്ധിച്ചു. കൂടുതല് പേര് താരത്തെ ഇന്സ്റ്റഗ്രാമില് ഫോളോ ചെയ്യാന് തുടങ്ങി. ഏറ്റവും കൂടുതൽ ഫോളോവേഴ്സുള്ള മൂന്നാമത്തെ താരമായി മാറിയിരിക്കുകയാണ് ബോളിവുഡ് നടി ശ്രദ്ധ കപൂര്; ഏകദേശം 91. 5 മില്യൺ ഫോളവേഴ്സാണ് ശ്രദ്ധ കപൂറിന് ഇപ്പോള് ഉള്ളത്. ഇന്ത്യൻ ക്രിക്കറ്റ് താരം വിരാട് കൊഹ്ലിയും പ്രിയങ്ക ചോപ്രയും കഴിഞ്ഞാല് ഇന്സ്റ്റഗ്രാം ഫോളോവേഴ്സിന്റെ കാര്യത്തില് ശ്രദ്ധ കപൂറാണ് മൂന്നാം സ്ഥാനത്ത്. വിരാടിന് 271 മില്യൺ ഫോളോവേഴ്സും പ്രിയങ്ക ചോപ്രക്ക് 91.8 മില്യൺ ഫോളോവേഴ്സുമാണുള്ളത്.
