തിരുവനന്തപുരം: നെയ്യാറ്റിന്കരയില് ഓട്ടോറിക്ഷ ഡ്രൈവറെ വെട്ടിപ്പരിക്കേല്പ്പിച്ച കേസില് മൂന്നു പേര് അറസ്റ്റില്. കോട്ടുകാല് പെരിങ്ങോട്ടുകോണം സ്വദേശി തമ്പി എന്ന് വിളിക്കുന്ന അനന്തു, വെണ്പകല് സ്വദേശി അഭിജിത്ത്, വെണ്പകല് ചൂണ്ട വിളാകം സ്വദേശി അനന്തു എന്നിവരെയാണ് അറസ്റ്റ് ചെയ്തത്.
അവണാകുഴി സ്വദേശിയും ഓട്ടോറിക്ഷാ ഡ്രൈവറുമായ ദിനേശ് കുമാറിനെയാണ് കഴിഞ്ഞ ദിവസം രാത്രിയില് അവണാ കുഴി ജംഗ്ഷനില് നില്ക്കുമ്പോള് ബൈക്കിലെത്തിയ മൂന്നംഗ സംഘം വെട്ടിപ്പരിക്കേല്പ്പിച്ചത്. പ്രതികള് ഓട്ടോയില് ചാരി നിന്നത് ദിനേശ് കുമാര് ചോദ്യം ചെയ്തിരുന്നു. ഇതാണ് പ്രകോപനത്തിന് കാരണമെന്നാണ് പ്രാഥമിക വിവരം. തുടര്ന്ന് ഓട്ടോറിക്ഷ അടിച്ചു തകര്ക്കാന് പ്രതികള് ശ്രമിച്ചു. അത് തടയാന് ശ്രമിച്ച ഡ്രൈവറെ കയ്യില് കരുതിയിരുന്ന വെട്ടുകത്തി ഉപയോഗിച്ച് വെട്ടി പരിക്കേല്പ്പിച്ച ശേഷം പ്രതികള് രക്ഷപ്പെടുകയായിരുന്നു.
ഗുരുതര പരിക്കുകളോടെ ദിനേശ് കുമാര് തിരുവനന്തപുരം മെഡിക്കല് കോളേജില് ചികിത്സയിലാണ്. മുമ്പും കാഞ്ഞിരംകുളം, നെയ്യാറ്റിന്കര സ്റ്റേഷനുകളില് നിരവധി അടിപിടി കേസുകളില് പ്രതികളാണ് ഇവര്. പ്രതികളെ കോടതിയില് ഹാജരാക്കി റിമാന്ഡ് ചെയ്തു.
