കോട്ടയം: താര സംഘടനയായ ‘അമ്മ’യില് അഭിപ്രായ ഭിന്നതയുണ്ടെന്ന് വരുത്താന് നടനും വൈസ് പ്രസിഡണ്ടുമായ ജഗദീഷ് ഇടയാക്കിയെന്ന് അംഗങ്ങള്ക്കിടയില് വിമര്ശനം. സംഘടന ഒരു പ്രതിസന്ധിയെ നേരിടുന്ന ഘട്ടത്തില് ഒന്നിച്ചു നില്ക്കാതെ ജഗദീഷ് ആളാകാന് നോക്കിയെന്നാണ് ആക്ഷേപം. ഹേമ കമ്മിറ്റി റിപ്പോര്ട്ടില് അമ്മയുടെ ഔദ്യോഗിക നിലപാട് പ്രഖ്യാപിക്കാന് ജനറല് സെക്രട്ടറി സിദ്ദിഖ് പത്രസമ്മേളനം വിളിച്ചുവെങ്കിലും അതിനിടെ വൈസ് പ്രസിഡണ്ടായ ജഗദീഷ് സ്വന്തം നിലയ്ക്ക് മാധ്യമങ്ങളോട് സംസാരിക്കുകയായിരുന്നു. നടന്മാര്ക്ക് എതിരായ ലൈംഗികാരോപണങ്ങളില് നിന്ന് അമ്മയ്ക്ക് ഒഴിഞ്ഞുമാറാന് ആവില്ലെന്ന ജഗദീഷിന്റെ നിലപാട് സംഘടനയെ വെട്ടിലാക്കി. ഇതിനൊപ്പം പത്രസമ്മേളനത്തില് കുഴുപ്പിക്കുന്ന ചോദ്യങ്ങളില് പെട്ട ജനറല് സെക്രട്ടറിയും സംഘവും പ്രതിരോധത്തില് ആവുകയും ചെയ്തു. മുഖ്യമന്ത്രിക്ക് മുന്നില് പഞ്ചപുച്ഛമടക്കി പറയുന്നത് കേട്ട് ഇരിക്കുന്ന മാധ്യമ പ്രവര്ത്തകര് സിദ്ദിഖിനെയും സംഘത്തെയും പത്രസമ്മേളനത്തില് ഇട്ട് പൊരിച്ചത് ജഗദീഷിനെപ്പോലുള്ള ഒറ്റുകാരുടെ നിലപാടുകള് മൂലമാണെന്നാണ് ചില അംഗങ്ങള് ചൂണ്ടിക്കാട്ടിയത്.
