കൊച്ചി: മുഖ്യമന്ത്രി പിണ റായി വിജയന്റെ മകൾ വീന വിജയനെതിരായ മാസപ്പടി കേസിൽ കരിമണല്‍ കമ്പനിയായ സിഎംആര്‍എലിൽ ഉദ്യോഗസ്ഥരെ ചോദ്യം ചെയ്യാന്‍ സീരിയസ് ഫ്രോഡ് ഇന്‍വെസ്റ്റിഗേഷന്‍ ഓഫിസ് (എസ്എഫ്ഐഒ). ഇതിന്റെ ഭാഗമായി സിഎംആര്‍എലിലെ ഡയറക്ടർ അടക്കമുള്ള എട്ട് പേർക്ക് സമൻസ് നൽകി. ഈ മാസം 28, 29 തീയതികളിൽ ചെന്നൈയിൽ ഹാജരാകാനാണ് നിർദേശം.
അതേസമയം, അറസ്റ്റ് തടയണമെന്ന് ആവശ്യപ്പെട്ട് സി എം ആർ എൽ ഡൽഹി ഹൈക്കോടതിയിൽ ഹർജി നൽകിയിട്ടുണ്ട്. വീണയുടെ ഉടമസ്ഥതയിലുള്ള എക്‌സാലോജിക് സൊല്യൂഷൻസിന് ചെയ്യാത്ത സേവനത്തിന് സി എം ആർ എൽ കമ്പനി പ്രതിഫലം നൽകിയെന്നാണ് ആരോപണം. ഇതിലാണ് എസ് എഫ് ഐ ഒ അന്വേഷണം നടത്തുന്നത്.
പ്രതികള്‍ കുറ്റക്കാരെന്ന് തെളിഞ്ഞാല്‍ അറസ്റ്റ് ചെയ്യാന്‍ പോലും അധികാരമുള്ള ഏജന്‍സിയാണ് എസ് എഫ് ഐ ഒ. കോർപ്പറേറ്റ് മന്ത്രാലയത്തിലെ ഏറ്റവും ഉയർന്ന ഉദ്യോഗസ്ഥർ അടങ്ങിയ ആറംഗ സംഘമാണ് കേസ് അന്വേഷിക്കുന്നത്. എക്‌സാ ലോജിക്കിലെ ജീവനക്കാർക്കും സമന്‍സ് നല്‍കിയതായി റിപ്പോർട്ടുകളുണ്ട്. നേരത്തെ എസ്എഫ്ഐഒ അന്വേഷണം സ്റ്റേ ചെയ്യണമെന്നാവശ്യപ്പെട്ട് എക്‌സാലോജിക് കര്‍ണാടക ഹൈക്കോടതിയെ സമീപിച്ചിരുന്നു . എസ്എഫ്ഐഒ, കേന്ദ്ര കോര്‍പറേറ്റ് കാര്യ മന്ത്രാലയം എന്നിവരെ എതിര്‍കക്ഷികളാക്കി നല്‍കിയ ഹര്‍ജി കോടതി പക്ഷേ അംഗീകരിച്ചിരുന്നില്ല.
അന്വേഷണം നിര്‍ത്തിവയ്‌ക്കണമെന്നാവശ്യപ്പെട്ടായിരുന്നു വീണയുടെ കമ്പനി ഹര്‍ജി സമര്‍പ്പിച്ചിരിക്കുന്നത്. കെഎസ്‌ഐഡിസി നല്‍കിയ സമാന ഹര്‍ജി കേരള ഹൈക്കോടതിയും അനുവദിച്ചിരുന്നില്ല.
പ്രതികരിക്കാൻ ഇവിടെ എഴുതുക: