തിരുവനന്തപുരം: സാലറി ചലഞ്ചിലൂടെ സര്ക്കാര് ജീവനക്കാരുടെ അഞ്ചുദിവസത്തെ ശമ്പളം നിര്ബന്ധമാക്കിയ ഉത്തരവ് പുനഃപരിശോധിക്കണമെന്ന് ആവശ്യപ്പെട്ട് കേരള എന്ജിഒ സംഘ് സംസ്ഥാന നേതാക്കള് മുഖ്യമന്ത്രിയെ കണ്ടു.
ക്ഷാമബത്ത ഉള്പ്പെടെയുള്ള ആനുകൂല്യങ്ങള് സമയബന്ധിതമായി ലഭിക്കാതെ സാമ്പത്തിക പ്രയാസം അനുഭവിക്കുന്ന താഴ്ന്ന ശമ്പളക്കാരായ ജീവനക്കാര്ക്ക് അവരവരുടെ കഴിവിനനുസരിച്ച് സംഭാവന നല്കണമെന്ന് ആഗ്രഹമുണ്ടെങ്കിലും കഴിയാത്ത സാഹചര്യമാണ് നിലവിലുള്ളത്. ജീവനക്കാര്ക്ക് സ്വമേധയാ നല്കാന് കഴിയുന്നത്ര തുക സംഭാവനയായി സ്വീകരിച്ച് വയനാട് പുനര്നിര്മാണ പ്രവര്ത്തനങ്ങളില് മുഴുവന് ജീവനക്കാരെയും പങ്കാളികളാക്കുന്നതിന് പുതിയ ഉത്തരവ് പുറപ്പെടുവിക്കണമെന്ന് ആവശ്യപ്പെട്ട് നിവേദനം നല്കി.
ഈ ആവശ്യം ഉന്നയിച്ച് ധനകാര്യ വകുപ്പ് മന്ത്രി, ചീഫ് സെക്രട്ടറി എന്നിവരെയും നേരില് കണ്ട് നിവേദനം നല്കി. സംസ്ഥാന ജനറല് സെക്രട്ടറി എസ്. രാജേഷ്, വൈസ് പ്രസിഡന്റ് പി.വി. മനോജ്, ജോയിന്റ് സെക്രട്ടറി പ്രദീപ് പുള്ളിത്തല, സംസ്ഥാന സമിതി അംഗം ബിജു പാക്കോട് എന്നിവര് പങ്കെടുത്തു.
