അപ്പോള്‍, എങ്ങനെയാണ് സജി ചെറിയാന്‍, ഈ ജനപ്രിയ അവാര്‍ഡ് റദ്ദുചെയ്യുകയല്ലേ ?

കോട്ടയം: ആരും കാണാത്ത സിനിമ ജനപ്രിയ സിനിമയ്‌ക്കുള്ള സമ്മാനം കരസ്ഥമാക്കി. ഇക്കൊല്ലം സംസ്ഥാന സിനിമാ അവാര്‍ഡ് നിര്‍ണ്ണയ സമിതി കാണികള്‍ക്ക് കാഴ്ചവെച്ച മഹാദ്ഭുതമാണതെന്ന് മുന്‍ വി.സിയും പി. എസ്‌സി ചെയര്‍മാനും ഡോ.കെ.എസ്.രാധാകൃഷ്ണന്‍ സോഷ്യല്‍ മീഡിയയില്‍ അഭിപ്രായപ്പെട്ടു. കുറിപ്പിന്‌റെ പൂര്‍ണ്ണ രൂപം: സംവിധായകന്‍ ബ്ലസിയുടെ ആടുജിവിതം എന്ന സിനിമ സെന്‍സര്‍ ചെയ്തത് 2023 ഡിസംബര്‍ 31ന് . സെന്‍സര്‍ ചെയ്യാതെ സിനിമ പ്രദര്‍ശിപ്പിക്കാന്‍ പാടില്ല എന്നാണ് നിയമം. 2024ലാണ് സിനിമ തിയേറ്ററിലെത്തിയത്. അതിശയം എന്നേ കരുതാവൂ 2023 ല്‍ ഏറ്റവും കൂടുതല്‍ ആളുകള്‍ കണ്ട സിനിമയായി ജൂറി തെരഞ്ഞെടുത്തത് ആടുജീവിതത്തെയാണ്.
2023 ല്‍ ആരും കണ്ടിട്ടില്ലാത്ത സിനിമയെ ഏറ്റവും കൂടുതല്‍ പേര്‍ കണ്ട സിനിമയാക്കി മാറ്റിയ മായാവിദ്യ അപാരം തന്നെ. ഒരു സാഹിത്യ കൃതിയെ സിനിമയാക്കിയതുകൊണ്ട് സിനിമ നന്നാകണമെന്നില്ല. സംവിധായകന്‍ 16 കൊല്ലം പണിയെടുത്തു സിനിമ ഉണ്ടാക്കി എന്നതുകൊണ്ടും സിനിമ നന്നാകണമെന്നില്ല. എഴുപതു കോടി മുടക്കിയതുകൊണ്ടും മരുഭൂമിയില്‍ ചിത്രീകരിച്ചതുകൊണ്ടും സിനിമ നന്നാകണമെന്നില്ല. എന്നാല്‍ ആരും കാണാത്ത സിനിമയെ ഏറ്റവും കൂടുതല്‍ ആളുകള്‍ കണ്ട സിനിമയാക്കി മാറ്റിയ ആ സംവിധായക മികവിന് സമ്മാനം കൊടുക്കുക തന്നെ വേണം. അപ്പോള്‍, എങ്ങനെയാണ് സജി ചെറിയാന്‍, ഈ ജനപ്രിയ അവാര്‍ഡ് റദ്ദുചെയ്യുകയല്ലേ?