സൂപ്പർതാരങ്ങൾ പാൻ മസാല പരസ്യങ്ങളിൽ അഭിനയിക്കുന്നതിനെതിരെ വിമർശനവുമായി ശക്തിമാൻ താരം മുകേഷ് ഖന്ന. സൂപ്പർസ്റ്റാറുകളെ പിടിച്ച് നല്ല അടി കൊടുക്കണമെന്നും, അക്ഷയ് കുമാറിനെ താൻ ഇക്കാര്യം പറഞ്ഞ് ചീത്ത വിളിച്ചിട്ടുണ്ടെന്നും മുകേഷ് ഖന്ന പറയുന്നു.
“ഇവരെ പിടിച്ച് ചുട്ട അടി കൊടുക്കുകയാണ് വേണ്ടത്, ഇത്തരം പരസ്യങ്ങളിൽ അഭിനയിക്കുന്നത് മോശമാണെന്ന് ഞാൻ അവരോട് പറഞ്ഞിരുന്നു. ഇക്കാര്യം പറഞ്ഞ് അക്ഷയ് കുമാറിനെ ചീത്തവിളിക്കുകപോലും ചെയ്തു. ആരോഗ്യകാര്യത്തിൽ നല്ല ശ്രദ്ധയുള്ള അക്ഷയ് പോലും പാൻ മസാലയെ അനുകൂലിക്കുന്നു. അജയ് ദേവ്ഗണും ഇതേകാര്യം പറയുന്നു.
ഷാരൂഖും ഇതേ വഴിതന്നെയാണ് വരുന്നത്. കോടികളാണ് ഇത്തരം പരസ്യങ്ങൾക്കായി മുടക്കുന്നത്. ഇതുവഴി എന്ത് സന്ദേശമാണ് ഇവരെല്ലാം നൽകുന്നത്? നിങ്ങൾ ഒരു മദ്യക്കമ്പനിയുടെ പരസ്യത്തിലഭിനയിച്ചാൽ അതിനർത്ഥം നിങ്ങൾ ആ ഉത്പ്പന്നം വിൽക്കുന്നു എന്നുതന്നെയാണ്. എല്ലാവർക്കും അതറിയാം. വഴിതെറ്റിക്കുന്ന പരസ്യങ്ങളെന്ന് ഇതുകൊണ്ടാണ് അവയെ വിളിക്കുന്നത്.
വേണ്ടത്ര പണമില്ലാഞ്ഞിട്ടാണോ കമ്പനികൾ പരസ്യം ചെയ്യുന്നത്? ഇതുപോലെയൊന്നും ചെയ്യരുതെന്ന് ഞാൻ ആ നടന്മാരോട് പറഞ്ഞിട്ടുണ്ട്. അതുകേട്ട് പിൻമാറിയവരിൽ ഒരാളാണ് അക്ഷയ് കുമാർ. അമിതാഭ് ബച്ചൻപോലും ഇത്തരം പരസ്യങ്ങളിൽനിന്ന് പിൻവാങ്ങിയിട്ടുണ്ട്. എന്നിട്ടും കോടികളാണ് പാൻ മസാലയുടെ പരസ്യനിർമാണത്തിനായി മുടക്കുന്നത്.
നടന്മാർ പരസ്പരം ചുവന്ന നിറം വാരിയെറിയുന്നു. എന്നിട്ട് കുങ്കുമത്തിന്റെ നാരുകളാണെന്ന് പറയുന്നു. നിങ്ങൾ പുകയില ഉത്പ്പന്നങ്ങൾ ഉപയോഗിക്കാനാണ് ജനങ്ങളെ പഠിപ്പിക്കുന്നത്. ഒരിക്കലും അത് ചെയ്യരുത് എന്റെ കരിയറിൽ ഒരിക്കൽപ്പോലും സിഗരറ്റിന്റെയോ പാൻ മസാലയുടേയോ പരസ്യത്തിൽ അഭിനയിക്കണമെന്നാവശ്യപ്പെട്ട് ആരും വന്നിട്ടില്ല.” എന്നാണ് ബോളിവുഡ് ബബിൾ എന്ന മാധ്യമത്തിന് നൽകിയ അഭിമുഖത്തിൽ മുകേഷ് ഖന്ന പറഞ്ഞത്.
പ്രതികരിക്കാൻ ഇവിടെ എഴുതുക: