ഇന്ത്യയുടെ ബ്രഹ്മോസ് , ആകാശ് മിസൈലുകൾ വാങ്ങാൻ താല്പര്യം പ്രകടിപ്പിച്ച് ബ്രസീൽ . മിസൈലിനെ കുറിച്ച് ചർച്ച ചെയ്യാൻ ബ്രസീലിയൻ പ്രതിനിധി സംഘം ഈ മാസം ഇന്ത്യ സന്ദർശിക്കും. കരാർ ഉറപ്പിച്ചാൽ ഇന്ത്യയുടെ ആകാശ് മിസൈലുകൾ ബ്രസീലിയൻ സേനയുടെയും സ്വന്തമാകും. സ്‌കോർപീൻ ക്ലാസ് അന്തർവാഹിനികൾ നവീകരിക്കാനും ബ്രസീൽ ആലോചിക്കുന്നുണ്ട്. ഇതിനുൾപ്പെടെയുള്ള സാങ്കേതിക വിദ്യകളും ബ്രസീൽ ഇന്ത്യയോട് ആവശ്യപ്പെട്ടിട്ടുണ്ട്.
ഇത്തരം സന്ദർശനങ്ങളും ചർച്ചകളും ബ്രസീലിന്റെയും ഇന്ത്യയുടെയും പ്രതിരോധ ബന്ധം ശക്തിപ്പെടുത്തുമെന്നാണ് റിപ്പോർട്ട് .ഈ സഹകരണം സൈനിക ശേഷി വർദ്ധിപ്പിക്കുക മാത്രമല്ല, പ്രതിരോധ ഉൽപ്പാദനത്തിലും സാങ്കേതികവിദ്യ പങ്കിടുന്നതിലും തന്ത്രപരമായ പങ്കാളിത്തം വളർത്തുകയും ചെയ്യുന്നു.
മലേഷ്യ, ഇന്തോനേഷ്യ, ക്യൂബ, വിയറ്റ്നാം എന്നിവയാണ് ബ്രഹ്മോസിൽ താൽപ്പര്യം പ്രകടിപ്പിക്കുന്ന മറ്റ് രാജ്യങ്ങൾ. 2024 ഏപ്രിൽ 19 ന് സൂപ്പർസോണിക് മിസൈലുകളുടെ ആദ്യ ബാച്ച് വിതരണം ചെയ്തത് ഫിലിപ്പീൻസിനാണ് . 2022 ൽ ഫിലിപ്പീൻസുമായി ഇന്ത്യ 375 മില്യൺ ഡോളറിന്റെ കരാർ ഒപ്പിട്ടതിന് ശേഷമാണ് ബ്രഹ്മോസ് ആഗോള ശ്രദ്ധ നേടിയത്.
മലേഷ്യ തങ്ങളുടെ യുദ്ധവിമാനങ്ങളുമായി സംയോജിപ്പിക്കുന്നതിനാണ് ബ്രഹ്മോസ് ആവശ്യപ്പെടുന്നത് . വിയറ്റ്നാം ചൈനയുടെ ആക്രമണത്തെ ചെറുക്കുന്നതിനായാണ് ഇന്ത്യയുടെ സഹായം തേടിയിരിക്കുന്നത് .
കരയിൽ നിന്നും വായുവിലേക്ക് തൊടുക്കാൻ കഴിയുന്ന മിസൈൽ ആണ് ആകാശ് മിസൈൽ. ഇവയിൽ ന്യൂജനറേഷൻ ആകാശ് മിസൈലുകളാണ് ബ്രസീലിന് ആവശ്യം. കര സേനയ്‌ക്ക് വേണ്ടിയാണ് ബ്രസീൽ മിസൈൽ വാങ്ങുന്നത് ഇന്ത്യയുടെ പ്രതിരോധ ആയുധ നിർമ്മാതാക്കളായ ഡിആർഡിഒ ആണ് മിസൈലുകളുടെ നിർമ്മാതാക്കൾ.
പ്രതികരിക്കാൻ ഇവിടെ എഴുതുക